DILI, STLTIMORLESTE.com – Governu Timor Leste (TL) liu husi Ministeriu Saude (MS), Elia A.A dos Reis Amaral sei asina Memorandum of Understanding (MoU) ho Grupu Health Care husi Malazia (IHH), hodi halo formasaun espesialidade ba Profisional Saude TL.
Relasiona ho asina MoU nee, Embaixador Malazia iha TL, Amarjit Sarjit hamutuk ho ekipa husi grupu Health Care Malazia (IHH) iha Tersa lokrai, hasoru malu ho Primeiru Ministru (PM), Kay Rala Xanana Gusmão, hau lori delegasaun hodi diskute kona-ba asuntu nee iha Palasiu Governu, Tersa (08/07/2025).
“Hau lori delegasaun Grupu Health Care husi Malazia, neebe durante nee iha ona relasaun diak, liu-liu servisu hamutuk ona ho Ministeriu Saude TL nian. Ohin Ami hasoru malu ho PM Xanana no ita iha oportunidade atu kontinua kooperasaun liu-liu iha asuntu prioridade sira neebe mak PM Xanana rasik husu hanesan formasaun espesialidade ba pesoal saude sira, husi nasaun TL,” dehan Embaixador Malazia, Amarjit Sarjit ba jornalista sira hafoin enkontru ho PM Xanana iha Palasiu Governu.
Iha fatin hanesan, Ministra Saude, Elia A. A. dos Reis Amaral neebe akompanha Embaixador Amarjit Sarjit ho delegasaun hateten, IHH Health Care Malazia mak durante nee halao tratamentu ba pasiente Timoroan sira neebe Governu TL halo transferensia ba Malazia.
“Durante nee ita servisu hamutuk ho Grupu Health Care Malazia. Sira mak halao tratamentu ba ita nia pasiente neebe ita transfere ba Malazia. Ohin PM Xanana preokupa ho ida nee no husu atu ita hasae liu tan kapasidade profisional saude Timoroan sira. Tanba nee mak MS ho Grupo Healthcare Malazia, sei asina Memorandu Entendimentu ida, atu bele realiza formasaun iha TL nomos bele iha Malazia,” dehan Ministra Elia.
Responde perguntas kona-ba realizasaun asinatura MoU nee, Ministra Saude dehan sei halo uluk estudu, atu buka hatene area espesialidade ida neebe mak prioridade uluk ba formasaun nee.
Grupu Healthcare Malazia nuudar prestadora servisu saude privada importante boot ida iha Malazia, neebe iha ona kooperasaun ho TL durante tempu naruk.
“Ita mos iha konkordansia katak, sei hamutuk Grupu Health Care Malazia atu haree situasaun ida neebe mak ohin PM Xanana hatoo,” dehan nia.
(jos)
