MALAZIA, STLTIMORLESTE.com – Ministru Negosiu Estranjeirus no Kooperasaun, Bendito dos Santos Freitas reprezenta Vise Primeiru Ministru no Koordenador Asuntu Sosial no Ministru Dezenvolvimentu Rural no Abitasaun Komunitaria, Mariano Assanami Sabino asina Memorandu Entendimentu ida ho Vise Primeiru Ministru no Ministru Dezenvolvimentu Rural no Rejional, Honourable Dato’Seri Ahmad Zahid Bin Hamidi, iha ambitu dezenvolvimentu rural.
Memorandu Entendimentu nee asina iha okaziaun simeira ASEAN ba dala 47 iha Kuala Lumpur Malazia, no Timor Leste nia admisaun formal istoriku iha fraternidade ASEAN nuudar membru ba dala 11.
Ministru Negosiu Estranjeirus no Kooperasaun, Bendito Freitas hatete, antes nee iha ona konkordansia entre Vise Primeiru Ministru, Mariano Assanami Sabino ho nia omologu Honourable Dato’Seri Ahmad Zahid Bin Hamidi mak atu asina iha Malazia, maibe la konsege tanba Vise Primeiru Ministru Koordenador Assuntus Sosial laiha.
Governante nee hatutan, akordu nee konsideradu istoriku tebes, tanba liu tiha loron Timor Leste nia adezaun formal ba ASEAN mak nasaun rua selebra MoU refere.
“Depois de ita nia adezaun formal ba ASEAN, ita fila ba aspetu importantes iha ekonomia produtiva hanesan setor agrikultura, dezenvolvimentu rural nee importante tebes ba Timor Leste atu bele kumpri ba kriteriu ASEAN nian,” dehan Ministru Bendito Freitas ba jornalista sira, hafoin remata asinatura iha salaun Mandarin Oriental, Kuala Lumpur, Malazia. (28/10/2025).
Memorandu Entendimentu ida nee refleta nasaun rua nia kompromisu hamutuk atu avansa kooperasaun iha dezenvolvimentu rural, no atu hametin ligasaun husi ema-ba-ema entre nasaun rua nee.
Objetivu prinsipal husi MoU nee mak atu hametin kooperasaun bilateral iha ambitu dezenvolvimentu rural iha area importante hirak hanesan Dezenvolvimentu Kapital Umanu: Dijitalizasaun: Hakbiit Ekonomiku: No mos Promosaun kona-ba eko no agro-turizmu.
“Ninia importansia iha area dezenvolvimentu rural, nee importante tebe-tebes ba ita nia dezenvolvimentu Timor Leste, tanba potensias dezenvolvimentu ekonomika ninia baze mak ekonomia rural, tanba nee mak Malazia fahe ninia esperiensia katak, durante dekada 6 sira luta par atu tau sistema teknolojia ba dezenvolvimentu sira ohin loron sira bele sai nasaun ida avanasadu no produtivu iha ekonomia rural,” tenik tan.
MoU refere mos simboliza Timor Leste ho Malazia nia kompromisu neebe fahe no inisiu ba kooperasaun ida neebe signifikativu.
Jornalista: Alberto Menezes
Editor: Xisto Mendonça
