DILI, STLTIMORLESTE.com – Jerasaun Patriota, Antonio Xavier hatete, Timor Leste (TL) hanesan nasaun independente neebe moris ho nia prinsipiu no valores neebe forma povu no nasaun ida, atu bele hatene ninia identidade rasik.
Nia dehan, prinsipius no valores kulturais mai kedas husi beiala sira, valores rezistensia nian neebe patriota sira defende no kaer metin hodi luta ba ukun rasik-aan no valores neebe mai husi Igreja Katolika neebe hola parte integrante iha forma konjuntura propria identidade TL nian.
“Hanesan jerasaun patriota hau hakarak haree ita nia sosiedade ida moris iha Pais Timor Leste ho ninia identidade rasik. Atu alkansa pais ida ho sosiedade ida ho ninia identidade rasik, ita presiza esforsu boot ida hodi bele dezenvolve valores sira neebe ita fiar ba iha moris lor loron,” dehan Antonio ba STL, iha Kaikoli, Dili, Sabadu (07/02/2026).
TL tuir presiza dezenvolve nia aan nuudar Estadu no nuudar Nasaun. Dezenvolvimentu laos deit kona-ba harii infraestrutura fizika no ekonomia, maibe importante mos dezenvolve setor sosial hanesan arte no kultura, nuudar provas katak TL iha ninian karater no sivilizasaun rasik, nunee mos hanesan prinsipiu no valores hodi reflete indentidade povu no nasaun ida nian.
Iha parte ketak, Akademista UNTL, Tomas Quintão Nunes hatete, kultura mak ema nia klamar iha neeba mak ema hetan identidade nia forsa, memoria rezilensia nian, esperansa ba futuru ida neebe kreativu, no inkluzivu liu.
(car)
