DILI, STLTIMORLESTE.com – Timor Leste (TL) nia ekonomia buras no solidu ho prezervasaun no vizaun estratejika, no inflasaun mantein ho 0.1%.
Prezidente Republika Jose Ramos Horta hatete, TL ekonomia neebe buras, ohin loron revela-an nuudar ekonomia neebe buras beibeik no solidu, halo ho esforsu, no vizaun estratejika.
“Tuir banku sentral ita-nia ekonomia tenke habelar ho 4.4% iha 2025, hafoin kresimentu ida ho 4.1% iha 2024 sinal klaru sira reziliensia no progresu nian. Inflasaun mantein nafatin ho deit 0.1% too Junu 2025, projeta atu estabiliza iha 0.5% too tinan nia rohan, kiik liu 2.1% neebe rejista iha 2024,” dehan Prezidente Republika liu husi nia diskursu iha Palasiu Governu, Sesta (28/11/2025).
Nia hatete, sistema bankariu mos hametin daudaun, ho depozitu sira neebe atinji US$ 1.736 biliaun too Junu tinan ida-nee refleksu ida husi konfiansa neebe buras husi negosiu sira no família sira iha futuru.
Xefe Estadu hatete, fundu soberanu TL nuudar símbolu jestaun prudente no vizionaria ba ita-nia rekursu nasional sira.
Iha tinan 2009 ho lideransa Xanana Gusmão, Primeiru-Ministru iha tempu neeba, hahu reformulasaun estratejika ida ba ninia aplikasoens sira, hodi diversifika investimentu sira no harii baze sira ba futuru ida neebe seguru no prosperu.
Durante dekada ida, vizaun ida-nee fo rezultadu impresionante sira US$ 11.2 biliaun iha kresimentu kumulativu. Iha 2024, retornu investimentu nian atinji biliaun US$ 1.223, ho rendimentu anual 7.26%, mantein solidu iha 6.19% too Junu 2025.
Fundu nia rekursu sira investe ho rigorozu no matenek iha obrigasaun sira tezouru estadus unidus nian, merkadu dezenvolvidu sira no asoens sira ho risku moderadu hodi asegura laos deit seguransa no estabilidade, maibe mos prosperidade neebe dura ba jerasaun sira iha futuru.
Nunee, Fundu Rikusoin Soberanu laos deit instrumentu finanseiru ida nee legadu moris ida, ai-riin konfiansa no esperansa nian neebe hametin TL nia futuru.
Jornalista: Emerenciana Pinto
Editora: Domingas Gomes
