DILI, STLTIMORLESTE.com – Estadu Timor Leste (TL) presiza hamoris no haburas sentimentu patriotizmu ho unidade nasional, tanba nee juventude tenke levanta nafatin preokupasaun komunidade iha sosiedade nian.
“Juventude tenke levanta nafatin preokupasaun importante sira, hanesan iha barometru 6 neebe importante, hanesan seguransa no protesaun, konflitu, knaar militarizmu, partisipasaun, akuntabilidade no igualdade jeneru,” dehan Porta Voz I, Silvano dos Santos ba jornalista sira liu husi konferensia imprensa iha Farol, Dili, Kinta (14/11/2024).
Tuir nia, bazeia ba rezultadu peskiza husi juventude sira durante halao implementasaun FGD iha Munisipiu Ainaro, Baukau, Bobonaro, Vikeke, Kovalima, Manufahi, Manatutu, Likisa, Aileu no Lautem, FGD nee rasik halao husi estudante Direitus Umanus no Justisa Sosial (AJAR), ho objetivu atu buka hatene klean konaba kodisaun real, juventude sira enfrenta iha terenu.
Tanba ideia sira nee hotu nakait ho hanoin neebe kritiku, analitiku no refletivu ba situasaun atual durante juventude sira preokupa iha periodu independensia.
“Iha dokumentus ida nee mos sei esplora ideia neebe holistiku no krusial iha konjuntura politika nasional, dialogu sira nee hotu ami hanesan juventude sei la hases husi lidun direitu umanus, konsekuensia seguransa interna no externa, dezempregu estrutural no implementasaun politika públika sira,” tenik nia.
Nia dehan, joven mak ema neebe tama ba faze adultu lo-loos nian, maske hakerek nanis ona iha politika nasional ba juventude nian, define metas no tarefas sira hanesan direitu, reponsablidade no obrigasaun.
Aleinde nee Akademiku husi Universidade Dili (UNDIL), Franselino Muises hatete, Juventude nudar ajente ba mundansa, tenke kria politika publika ida neebe dignu no kualidade ba joven sira, nunee ema hotu bele iha partisipasaun ativu ba asuntu publiku.
Tanba dezenvolvimentu baziku tenke ho modelu boton up hodi rona aspirasaun juventude sira nian no labele top down iha sistema governasaun agora. Presiza haburas inklusividade no valoriza direitu umanus mak tenke tau prioridade mos ba grupu marginalidade sira hanesan komunidade LGBTIQ nomos ho ema difisiente.
(EST 1)
