DILI, STLTIMORLESTE.com – Timor Leste (TL) iha kompromisu atu hametin dialogu bilateral no haburas kolaborasaun multilateral husi Nasoens Unidas, CPLP, ASEAN, OMK no forum internasional.
Prezidente Republika Demokratika Timor Leste, Jose Ramos Horta hatoo lia hirak nee liu husi nia diskursu, bainhira partisipa Aniversariu Independensia Republika Angola nian ba dala-50 iha Hotel Timor, Sesta (14/11/2025).
“Ami mos renova ami nia kompromisu atu hametin dialogu bilateral no haburas kolaborasaun multilateral liu husi Nasoins Unidas, CPLP, ASEAN, OMK no forum internasional sira seluk. Adezaun formal Timor Leste foin lalais nee nuudar Estadu-Membru ASEAN ba dala-11 loke era foun ba oportunidade sira ba kooperasaun ekonomika no promosaun investimentu,” dehan PR Horta.
Xefe Estadu dehan, integrasaun rejional ida nee sei permite Timor Leste atu estabelese nia aan nuudar plataforma estratejika entre Azia no mundu luzofonu, hodi sai laos deit odamatan privilejiadu ida ba investimentu angolanu iha rejiaun Azia-Pasífiku, maibe mos plataforma lojístika no komersial ba armazenamentu, prosesamentu no distribuisaun produtu angolanu sira iha merkadu komun ho konsumidor liu millaun 700 no produtu internu brutu liu dolar triliaun tolu tinan-tinan.
Loron 11 Novembru 1975, marka momentu neebe Angola proklama nia independensia, hodi marka inísiu trajetoria ida liberdade no autodeterminasaun nian, neebe konkista ho aten-barani, reziliensia no sakrifísiu husi povu angolanu.
Xefe Estadu dehan, ohin selebra tinan 50 husi realizasaun sira no fo onra ba eroi no eroína sira independensia nian neebe kontribui makaas tebes hodi harii Angola ida neebe livre no soberanu. Timor Leste sente afinidade klean ho istoria Angola nian.
“Ita nia amizade bazeia ba valor universal sira solidariedade, justisa no kooperasaun nian, no ho konfiansa mak ita haree ba futuru ita-nia relasaun bilateral. Hau iha konviksaun tomak katak lasu sira entre Timor Leste no Angola sei hametin nafatin, tantu iha dialogu polítiku no ekonomiku, no iha kontestu kooperasaun multilateral, reforsa ita nia prezensa iha CPLP, iha Uniaun Afrikana no iha mekanizmu entendimentu internasional sira seluk,” dehan PR Horta.
PR Horta dehan, vizita Estadu nian ba Angola iha Julhu 2024, bainhira sai testemunha rasik dezenvolvimentu husi nasaun Afrikanu importante ida-nee. Desde funu sivíl nia rohan, Angola hatudu ona trajetoria notavel ida rekonstrusaun no modernizasaun nian, sai hanesan ezemplu inspirador ida iha kontinente afrikanu.
Nasaun nee estratejikamente investe ona iha infraestrutura, diversifikasaun ekonomika, edukasaun no inovasaun, hodi buka atu hamosu oportunidade no moris-diak ba sidadaun hotu-hotu.
Progresu ida nee tau Angola iha oin dezenvolvimentu Afrikanu nian no reforsa nia pozisaun lideransa no influensia iha Uniaun Afrikana nia laran no iha orgaun rejional no internasional sira seluk.
Nunee mos nomeasaun Prezidente João Lourenço nian nuudar Prezidente Uniaun Afrikana (fevereiru 2025), inaugurasaun ba Embaixada Angola iha Díli (maiu 2025), no tomada pose ba Embaixador foun Timor Leste nian iha Angola, eventu sira neebe loke oportunidade foun atu aprofunda liu tan ita nia kooperasaun polítika, ekonomika no kultural iha nível hotu-hotu.
Jornalista: Emerenciana Pinto
Editor: Xisto Mendonça
