DILI, STLTIMORLESTE.com – Jurista Timor Oan, Sergio Dias Quinta hatete, Timor Leste sai membru ASEAN hanesan valor istoriku ida, tanba nee ba oin presiza hadia infraestrutura bazika sira neebe aat.
Nia dehan, Timor Leste ofisialmente sai membru ASEAN iha loron 26 fulan outubro tinan 2025, loron refere konsidera iha valor istoriku ba Timor Leste tanba sai membru iha organizasaun país iha ASEAN. Wainhira sai membru iha obrigasaun no iha direitu hanesan ho sira seluk no kumpri regra husi organizasaun refere.
“Wainhira sai membru plena ASEAN atu Timor Leste labele sai fatin destinadu deit, maibe presiza hadia infraestrutura basiku liu-liu estrada publika tantu iha kapital no munisipiu, para atu nune bele estimula atividade ekonomia pais,” dehan Sergio ba STL iha Kaikoli, Díli, Segunda (27/10/2025).
Tuir Sergio, ema hatene katak merkadu ASEAN boot tebes, infraestrutura seluk presiza rezolve maka energia eletrisidade labele lakan-mate, selae halo investor tama mai laiha garantia ba sira nia investimentu, hadia fornesimentu be mos ho sufisiente.
Nia hatutan, setor balu neebe importante para governu tau prioridade maka setor saude, infraestrutura, edukasaun no law enforcement, espera katak wainhira governu prioritiza setor sira nee iha futuru Timor Leste bele alkansa nia objetivu katak, iha justisa sosial ba hotu, uma vez ke Timor Leste sai ona membru ASEAN.
Tanba tuir relatoriu banku mundial Timor Leste nia populasaun 40% ital sei moris iha kiak multi dimensional entaun governu presiza halo esforsu, hodi hatun numeru kiak faseadamente selae uma vez ita sai membru ASEAN maibe pelo kontra numeru kiak sei bele aumenta, ita sai bainaka ba iha ita nia rai rasik, ema estrantranjeiru neebe iha kapital sira maka sei sai sujeitu ba desenvolvimentu.
Iha sorin seluk, Akademiku UNTL, Rafael de Jesus dehan, marka istoria foun ida, no agardese ba esforsu neebe governu ida nee halo.
“Agradese ba esforsu neebe governu ida nee halo ikus mai Timor Leste sai mos membru ASEAN, ida nee hanesan pasu importante ida,” dehan nia.
Jornalista: Terezinha De Deus
Editora: Carme Ximenes
