DILI, STLTIMORLESTE.com – Governu Timor Leste (TL) sei fo apoiu ba vitima rai nakdoko neebe mak akontese iha Nasaun Tailandia no Mianmar.
Lia hirak nee hatoo husi Primeiru Ministru Kay Rala Xanana Gusmão ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolao Lobato, Bairo Pite, Kinta (03/04/2025).
Primeiru Ministru dehan, hanesan ema hotu hatene foin lalais akontese rai nakdoko iha Tailandia no Mianmar neebe mak rezulta ema barak lakon vida nomos balun kanek, ho ida nee mak Governu TL sei fo donativu ba nasaun Tailandia no Mianmar.
“Foin daudaun nee imi hotu akompanha, haree ba hakfodak, uma andar sira iha Mianmar nakdoko hanoin katak atu baku fila, lae, nakdoko nee ba too Tailandia. Ho ida nee mak horiseik mos Konselhu Ministru deside halo rezolusaun ida atu haruka netik donativu ruma ba hamutuk ho ASEAN. Husi Ministeriu Negosiu Estranjeiru dehan Tailandia sira neeba terus liu, tanba Tailandia nee mos fo ajuda nee mak hanesan Tailandia dehan nee ASEAN ninian, ajuda mak sira neebe terus liu nee,” dehan PM Xanana.
PM hatete, maibe besik fronteira ho Tailandia, laiha hahan, laiha uma, laiha roupa, buat sira nee hotu nee mais US$ 100 mil, husi Mianmar ninian nee mak horiseik fo netik ajuda ruma ba atu haruka ba ASEAN kaer ida nee.
Nunee mos iha Konselhu Ministrus aprova Projetu Rezolusaun Governu neebe aprezenta husi Vise Ministra ba Asuntus ASEAN, Milena Maria da Costa Rangel, kona-ba Kontribuisaun Voluntaria ho montante rihun US$ 500 ba Sentru Koordenasaun Asistensia Umanitária ASEAN (ASEAN Coordinating Center for Humanitarian Assistance (AHA Center), hodi apoia resposta ba situasaun emerjensia iha Repúblika Uniaun Mianmar, tanba kauza husi rai nakdoko foin lalais, neebe afeta ba rejiaun nee, ho konsekuensia grave, inklui lakon vida, dezlokasaun populasaun no destruisaun ba infraestrutura sosial, ekonomika no ambiental.
(eme)
