DILI, STLTIMORLESTE.com – Treinador husi Ekipa Futebol Timor Leste (TL) U-16, Efren Geronimo hateten, TL sei esforsu hodi halakon Cavo Verde iha jogu 90 minutus nia laran, tanba Cavo Verde mos derota no jogu nee ho presaun neebe mak aas oituan iha jogu orsida kalan.
Treinador Ekipa Futebol TL, Efren Geronimo hateten, iha jogu primeiru TL derota ho ekipa Portugal maibe TL sei la lakon esperansa no sei esforsu nafatin hodi hadau pontus ida husi Cabo Verde.
“Hau hanoin ekipa hotu-hotu hakarak atu sai mana nain ba jogu refere, maibe ami nia ekipa agora prepara hela para atu bele ba tuir jogu orsida kalan nee ho diak,” dehan Treinador Futebol TL.
Tuir nia, sei mantein nafatin ho line up ho primeiru jogu nian, tanba kestaun tuir esperiensia jogador nian, jogador barak liu mak husi minisipiu no sira ho esperiensia neebe foun no tuir kompetisaun neebe foun hodi prepara jogador sira ba futuru.
“Hau hanoin ida nee ekipa tekniku hamutuk ho treinador hadia tiha ona sala neebe mak antes hasoru Portugal,” nia fundamenta.
Iha fatin hanesan, Kapitaun Ekipa Futebol TL, Germano Junior Franco da Silva informa, preparasaun ba orsida kalan nian ekipa TL nafatin esforsu aan makaas ho diak liu tan, para nunee hodi halakon Cavo Verde iha jogu 90 minutus nia laran.
“Hau iha esperansa boot atu halakon Cavo Verde, nunee bele hetan oportunidade ba pontu tolu (3) nian no ami sei esforsu ho diak liu tan hodi halakon Cavo Verde,” nia hakotu.
(EST 1)
