DILI, STLTIMORLESTE.com – Deputada husi Bankada CNRT, Virginia Ana Belo hateten, Timor Leste (TL) sei hetan impaktu husi tarifa neebe Estadus Unidus Amerika (EUA) aplika ba nasaun sira, tanba TL dependensia liu ba iha fundu petroliferu.
Deputada husi Bankada CNRT, Virginia Ana Belo preokupa kona-ba tarifa neebe EUA aplika ba nasaun sira inklui Timor Leste sei hetan nia impaktu, tanba dependensia liu ba iha fundu petroliferu no reseitas domestika kiik liu, ho nunee husu ba Governu hodi haree kestaun nee.
“Ninia intensaun nee ba liu Xina ho Europa, nasaun kiik ladun hetan boot maibe nafatin, Timor Leste ita hetan nia impaktu, tanba ita nia dependensia ba iha fundu petroleu, ita nia reseitas domestika kiik, oinsa Governu no linha ministeriail sira ninia haree para ita enfrenta situasaun ida nee iha futuru mai,” katak Deputada Virginia Ana Belo liu husi plenaria iha Parlamentu Nasional, Segunda (14/04/2025).
Hatan ba preokupasaun nee, VisI Ministru Asuntus Parlamentares, Aderito Hugo hatete, Timor Leste ninia esportasaun prinsipal mak kafe, ho nunee sei iha impaktu oituan iha esportasaun kafe, maibe ministeriu relevante sira daudaun nee haree hela asuntu nee.
“Supreza tebes-tebes ba internasaun Estadu hotu nasaun iha mundu tomak inklui Timor Leste neebe hanesan sujeitu ba implementasaun tarefa ne’ebe Prezidente Trump introduz, mais ita tama ona iha Linstagem 10%, ho ita nia esportasaun produtu nasional ne’ebe laos boot, impaktu oituan ba ita nia esportasaun kafe, tanba ita nia esportasaun prinsipal iha ne’e mak kafe,” katak Aderito Hugo.
Nia haktuir, agora tempu kafe nian kolleita tinan ida nee nian faan hotu ona karik, sei iha komprador sira neebe iha atu ba Amerika entuan sira intorduz oituan tarefa ida 10% nee.
Enkuantu iha loron 2 fulan Abril nee Casa Branca publika imajen grafiku neebe uza husi Prezidente Donald Trump hodi deskreve tarifa sira neebe sei aplika ba nasaun sira iha mundu hamutuk 185.
Lista ba tarifa nian ne’e inklui husi nasaun Xina, Uniaun Europeia, Vietname Taiwan, Peru, Nikaragua, Norwegia, Emiradu Arabe Unidu, India, Koreia do Sul, Reinu Unidu no nasaun sira seluk tan.
(EST 2)
