DILI, STLTIMORLESTE.com – Timor Leste Pres Union (TLPU) kapasita formasaun ba jornalista sira kona-ba literasia mediatika no mudansa klimatika molok halo reportajen iha munisipiu.
Prezidente TLPU, Candido Alves hatete, formasaun ohin nee koalia kona-ba literasia media.
“Ita fo formasaun ida nee tanba ita haree durante nee iha media sosial, tanba nee mak ita atu fo hanoin ba jornalista sira katak ita tenke tetu lia los nee mak ida neebe antes ita atu publika,” dehan Candido ba jornalista sira iha Fokupers Farol, Dili, Kinta (14/11/2024).
Tanba tuir nia, wainhira iha media sosial hakerek buat neebe mak falsa, ema hotu halai ba media ida neebe mak obra jornalista sira nian.
“TLPU nuudar organizasaun jornalista ida neebe mak responsabilidade mos ba jornalista, entaun buka para oinsa mak atu fo formasaun ba jornalista sira hodi hatene kona-ba lia los mak ida neebe no lia falsu mak ida neebe,” katak nia.
Iha fatin hanesan, Sekretariu Estadu Komunikasaun Sosial, Expedito Dias hatete, literasia mediatika iha kontestu ohin loron importante ho avansu teknolojia difísil, atu defini ida neebe mak lia los no ida neebe mak lia falsu.
“Tanba nee mak ita presiza kompriende literasia mediatika atu nunee ita bele taes ida neebe mak bele fo sai no ida neebe labele fo sai,” dehan nia.
(mar)
