DILI, STLTIMORLESTE.com – Tribunal Judisial Primeira Instansia Dili (TPJID) liu husi despaisu ba prosesu Primeiru interogatoriu, deside aplika medida Termu Indentidade Rezidensia (TIR) ba arguidu nain hitu (7), ligadu ho kazu neebe akontese iha Kampun Alor.
Prosesu nee iha arguidu hamutuk nain 9, maibe Tribunal identifika katak, arguidu nain tolu ho idade sei kiik, tanba nee Tribunal liberta tiha no deside rona deit arguidu nain 7.
Iha prosesu nee, rona tiha arguidu sira, ikus mai Juiz Estajiadu nain ida, deside aplika TIR ba arguidu nain hitu.
Iha alegasaun Prokurador husu Tribunal atu aplika medida Aprezentasaun Periodika, maibe Tribunal entende katak, atu aplika medida refere la prense ba iha nia rekejitus sira, ho nunee maka deside aplika medida TIR ba arguidu nain 7.
“Despaisu Tribunal nian aplika TIR ba nain hitu (7), no arguidu nain tolu (3) inputabilidade por razaun idade, entaun sira la iha responsabilidade kriminal, tanba nee maka Juiz liberta sira hodi aplika TIR,” dehan Defensor Publiku, Sergio Dias Quintas ba jornalista sira, iha Kaikoli, Dili, Kuarta (03/12/2025).
Tuir Sergio, ida nee foin iha faze investigasaun, tenke kumpri segredu justisa husik prosesu nee lao, no husi investigasaun maka foin hatene.
Iha Juiz nia despaisu mos indika katak, arguidu nain hitu (7) mos la iha indisus ba krime, Insendiu, Danu Agravadu, no mos Ofensa Korporais Simples, maibe prosesu nee sei iha investigasaun hela, ba oin maka sei haree Ministeriu Publiku (MP) akuza krime saida ba arguidu nain hitu.
Tanba MP dun krime ba arguidu sira, iha momentu neeba akontese sunu uma ida, no vitima nain rua hetan tuda husi ema deskonesidu. No Polisia too ba iha loron ona, Polisia kaer arguidu sira ba detein, no la halo investigasaun klean.
Maibe momentu neeba arguidu ida halo komemorasaun ba nia oan nia tinan, ema barak partisipa iha neeba too iha tuku tolu madrugada, foin maka akontese tuda malu rezulta kios ida hetan sunu no ema nain rua kanek, Polisia too mai evakua vitima nain rua ba iha ospital, no iha loron mak Polisia mai fali foti arguidu sira.
Iha alegasaun MP husu atu aplika medida Aprezentasaun Periodika (AP), maibe ikus mai Tribunal deside aplika medida Termu Indentidade Rezidensia (TIR), ba arguidu nain hitu (7). Tanba Tribunal haree katak pedidu neebe MP husu, la relevante ho artigu 183 husi Kodigu Prosesu Penal.
Hanesan defeza, konsidera medida TIR neebe Tribunal aplika proposional no adekuadu, tanba nee Sefeza sei la rekore.
Prosesu nee prezide husi Juiz Estajiadu nain ida, Ministeriu Publiku reprezenta husi Prokurador estajiadu nain ida, arguidu sira hetan asistensia legal husi Defensor Publiku, Sergio Dias Quintas.
Jornalista: Terezinha De Deus
Editora: Carme Ximenes
