DILI, STLTIMORLESTE.com – Relasiona ho politika Governu liu husi Sekretariu Estadu Formasaun Profisional no Empregu (SEFOPE) fo kontratu ba trabalhador Timoroan nain 27 prepara ba servisu iha Australia.
“Ita nia trabalhador neebe atu prepara ba servisu iha Australia, ohin asina ona deklarasaun ho Governu Timor Leste, kompostu husi mane 22 no feto 5, fiar katak trabalhador sira nee bele ba servisu ho diak,” dehan Koordenador LSU, Eliterio Lemos liu husi nia diskursu iha Bekora, Dili, Tersa (12/11/2024).
Tuir Sekretaria Estadu ba Formasaun Profisional no Empregu, liu husi Diresaun Nasional Empregu Estranjeiru, neebe lideradu husi Kordenador LSU, Eliterio Lemos hatete, husi rekrutamentu ida nee Governu fo oportunidade ba trabalhador Timoroan ba servisu iha Australia, presiza servisu ho disiplina, nunee bele hamorin nafatin nasaun nee nia naran iha ema nia rain.
Tanba nee trabalhador sira tenki servisu hodi kumpri regras no lei nasaun Australia no atu labele halai ka sai husi sistema, tanba sistema mak bele lori trabalhador sira ba servisu iha Australia, nunee husu atu moris ho sistema fila ho sistema.
Iha sorin seluk, trabalhador Timoroan ba servisu iha Australia, João Anselmo Corro afirma, sistema nee sai regra ida, atu halina trabalhador Timoroan feto ou mane bele moris tuir, tanba sistema mak lori trabalhador sira ba servisu iha ema nia rain, nunee tenke moris tuir sistema neebe Governu iha.
“Hau fiar katak, oportunidade ida nee hanesan susesu ida ba trabalhador Timoroan hotu atu ba buka servisu iha ema nia rain, hodi halo mudansa ba moris nian, no bele ajuda ba nesesidade uma laran,” nia dehan.
Tanba nee, hanesan trabalhador Timoroan ida sente kontente tebes ho pllitika Governu liu husi SEFOPE halo, neebe sempre rekruta Timoroan iha klase dezempregu sira, ba servisu iha ema nia nasaun, liu-liu area hortikultura no agrikultura nian, atu hatan osan hodi hadia ba moris ba aan no mos ba familia nian.
(EST 1)
