DILI, STLTIMORLESTE.com – Selebrasaun aniversariu loron proklamasaun independensia 28 Novembru ba dala 49, trabalhador no estudante Timoroan iha Corea do Sul hatoo parabens ba povu, lider no eroi tomak Timor Leste.
Liafuan parabens nee hatoo husi Rosentino Barreto de Jesus, nuudar trabalhador Timoroan iha Corea do Sul iha area Fabrika katak, lori trabalhador Timoroan iha Corea do Sul hatoo parabens ba rai doben Timor Leste neebe selebra loron proklamasaun independensia ba dala 49.
“Hanesan joven no foinsae Timoroan orgulhu no agradese ba luta nain sira hotu neebe sakrifika sira nia aan ba rai doben TL, no ikus hetan independensia totalmente,” katak Rosentino Barreto ba STL via mensajen, Kuarta (27/11/2024), iha Corea.
Tuir nia, nuudar foin sae sira tenke aproveita diak oportunidade nee, no liberdade nee atu labele arepende iha loron ikus, nuudar joven tenke kria paz no unidade iha bairu no soseidade, no espresa solidaridade ba malu, nunee bele sai povu TL neebe mak unidade solidu iha nasaun sudeste aziatiku.
Nunee mos Fortunato Exposto, nuudar Trabalhador Timoroan iha Corea do Sul hatete, loron proklamasaun independensia ba dala 49, hakarak hatoo parabens ba lider istoriku no eroi sira hotu neebe mak ho aten brani hodi deklara ukun rasik aan.
“Ohin loron ami hetan ona anin foun no kore ona ami husi korente nakukun nian ba liberdade, tanba nee ami hatoo parabens ba povu TL tomak, nuudar Trabalhador nofoin sae Timoroan ida, espera katak Timoroan tomak nafatin banati tuir lider istoriku sira”, katak Fortunato.
Nunee mos Estudante Timoroan iha Corea do Sul, Olivia da Costa Barreto kongratula loron proklamasaun independensia ba dala 49.
Tuir nia, 28 Novembru tinan 2024 hanoin hikas tinan 49 liu ba, Timor proklama nia independensia ho korajen boot hatutan husi determinasaun no sakrifisiu ba nasaun. Loron nee fo dalan ba Timor atu hakmatek paz, livre no soberanu.
Nunee mos Jelina da Costa de Jesus, Estudante Timoroan iha Corea hatoo parabéns ba loron Proklamasaun Independensia unilateralmente, tanba nee parabéns ba eroi, lider sira no mos povu Timor neebe sakrifika aan iha luta, iha tinan 1974 no 1975 nunee Timor hetan Independensia totalmente no ohin loron selebra ba dala 49.
(gui)
