DILI, STLTIMORLESTE.com – Trabalhador Timoroan neebe servisu iha loja Xineza sira nian, loron Domingu mos kontinua servisu (Full time), tanba nee husu ba Governu liu husi Sekretariu Estadu Formasaun Profisional no Empregu (SEFOPE) atu kria lei hodi regula.
“Tuir lei SEFOPE katak, loron neebe fo liberdade ba funsionariu publiku, iha Sabadu no Domingu, maibe trabalhador Timoroan neebe servisu iha supermerkadu Xineza sira, Sabadu no Domingo mos kontinua servisu, entaun tempu ba sira atu pasa ferias ho familia laiha, pior liu tan mak loron Domingu ba igreja no misa laiha,” dehan Trabalhador Cesilia da Costa Tilman ba STL iha Bekora, Dili, Tersa (26/11/2024).
Nia hatete, tuir lo-loos Governu liu husi SEFOPE kria lei ida hodi regula, no asegura diak ba trabalhador sira nia kondisaun, katak loron Sabadu no Domingu hotu-hotu tenke ferias ka servisu part time, maibe servisu iha loja Xineza sira laiha, loron importante sira mos kontinua servisu.
Iha fatin seluk, Trabalhador Florindo Ximenes dehan, laiha problema salariu minimu US$ 115 kada fulan, maibe preokupasaun neebe boot liu ba trabalhador sira mak, husu ba SEFOPE atu kria lei efetivu ida, hodi asegura trabalhador sira, liu-liu loron Sabadu ka Domingu, presiza fo livre ka ferias, nunee trabalhador sira bele pasa ferias ho familia sira.
Tanba loron boot loja Xineza Timor Leste kontinua loke no faan, liu-liu loron Domingu trabalhador sira kontinua halao servisu hanesan loron baibain katak full time. Nunee husu ba Governu atu harii lei ida, atu nunee ba Domingu bele fo servisu partime ka feriadu ba trabalhador sira ba igreja.
(EST 1)
