DILI, STLTIMORLESTE.com – Konfedesaun Sindikatu Timor Leste (KSTL) husu ba trabalhador sira labele tauk atu koalia sai bainhira hasoru situasaun asediu seksual iha Institutu Publiku (IP) no Empreza Publiku (EP) sira iha rai laran.
“Ami halo vijilansia ba Kompanhia 50 iha Timor Leste (TL), relasaun ho promove konvensaun ratifikasaun ba 190, liu-liu trabalhador feto sira hetan asediu seksual iha Institutu Publiku no Empreza publiku sira katak, prosesu nee nafatin eziji atu tau lei ho rigor, nunee bele asegura trabalhador sira,” dehan Prezidente KSTL, Almerio Vila Nova ba jornalista sira iha Hotel Luz Clarita Dili, Kinta (21/11/2024).
Trabalhador feto sira neebe servisu iha Institutu Publiku ka Empreza Publiku sira tuir nia labele tauk atu koalia sai bainhira hasoru situasaun ba asediu seksual nian, tanba tuir vijilansia neebe iha, iha kazu rua mak empregador ho nia trabalhador iha hanoin atu halo relasaun, nee krime, tanba nee husu ba sira atu labele tauk lori kazu nee ba oin.
Tanba hahalok asediu seksual iha Institutu Publiku sira nee, violensia kontra humanidade no diretu umanus nian, liu-liu viola diretu feto, tanba nee labele tauk atu koalia sai, tanba KSTL sempre fo apoiu atu levanta kazu sira nee, hodi asegura direitu feto no trabalhador sira sai afekuada.
Iha sorin seluk, Diretora Nasional Relasaun Trabalhu (DNRT) husi SEFOPE, Clementina de Araujo Almeida afirma, violensia no asediu iha mundu trabalhu, bele akontese ho formas oioin, estragu fijiku, pisikojiku, seksual no ekonomia no hahalo sira nee hotu labele atu tolera, tenke levanta tuir lei haruka.
Tanba konvensaun ba ratifikasaun 190 nee pasu importante neebe atu asegura diretu trabalhador sira iha IP no EP, nunee husu ba Governu, atu respeita promove no asegura, ema hotu nia diretu ba mundu trabalhu, ida neebe livre husi violensia no asediu seksual, liu husi envolvimentu ho empregador no organizasaun trabalhu sira.
(EST 1)
