DILI, STLTIMORLESTE.com – Trabalhador Timoroan sira neebe daudaun halo servisu iha loja, restaurante no kompanhia privadu iha Timor Leste (TL) sente triste ho promesa governante sira neebe halo promesa atu hasae salariu minimu husi US$ 115 kada fulan ba US$ 150, ate agora seidauk realiza sira nia promesa.
Kestaun nee levanta husi Trabalhador Family Supermerkadu Hudi Laran, Boaviana Soares Branco ba STL, Kuarta (19/03/2025).
“Hau hanesan trabalhador Timoroan Sente triste ho promesa husi ukun nain sira iha Kampanha Eleitoral dehan, kuandu sira manan ukun sei haree salariu trabalhador sira nian neebe kada fulan simu osan minimu US$ 115 sae ba US$ 150, promesa sira nee bosok deit atu hetan votus, ukun tiha haluha promesa sira nee,” dehan nia.
Nia haktuir tan katak, kada tinan sasan nesesidade baziku sae ba beibeik, maibe salariu ida nee nunka sae, kada fulan simu deit osan US$ 115 too US$ 120, susar tebes atu atende nesesidade uma laran, pior liu tan moris iha sidade Dili, buat kiik no boot sempre ho osan.
“Hau husu ba ukun nain sira hotu neebe mak kaer ukun iha nasaun TL kuaze tinan 1 ho balun ona, labele halo promete falsu hodi buka votus deit, maibe promesa hotu tenke ezekuta hodi nunee labele lakon konfiansa husi povu,” dehan nia.
Iha fatin ketak, Luis Soares nuudar trabalhador husi Loja Wfour Hudi Laran mos sente triste ho lider politiku sira iha nasaun ida nee, sira promesa atu diskute kona-ba salariu minimu atu hasae, too ohin loron sedauk realiza.
“Ami nia sentimentu nuudar trabalhador sente triste tebes-tebes, tanba ukun nain sira neebe mak kaer ukun promete beibeik ona atu diskute kona-ba direitu trabalhador iha rai laran, maibe ate agora sedauk diskute salariu baziku ba trabalhador neebe kada fulan kontinua simu salariu baziku neebe standar Sekretariu Estadu Formasaun Profisional no Empregu (SEFOPE).
Nia husu ba ukun nain sira iha nasaun ida nee sei bele karik diskute ona salariu baziku nee, tanba sasan nia folin aumenta sae, maibe salariu nafatin deit, prezudika nesesidade moris loron-loron.
(jos)
