DILI, STLTIMORLESTE.com – Relasiona ho deklarasaun Primeiru Ministru (PM), Kay Rala Xanana Gumão dehan atu transfere pasiente ba iha Atambua, Indonezia, nune’e mak sosiedade sivil Luta Hamutuk konsidera politika nee la fo benefisu ba povu, maibe hatun dignidade nasaun Timor Leste nian.
Primeiru Ministru, Kay Rala Xanana Gusmão hatoo nia deklasaun iha loron 6 fulan Marsu tinan 2025, hafoin hasoru malu ho Prezidente Republika, Jose Manuel Ramos Horta iha Palasiu Prezidensial, Bairo pite, Dili.
Programa Maneger Luta Hamutuk, Eriximo da Costa hateten, Primeiru Ministru nia politika refere la fo benefisu ba povu Timor Leste, maibe hatun dignidade Timor Leste hanesan nasaun soberania ida.
“Sosiedade sivil nia observasaun ba desizaun politika neebe mak Primeiru Ministru Xanana foti, hau hanoin la fo benefisiu ba Timor Leste, tanba naturalmente Timor Leste daudaun nee hanesan nasaun neebe independente, agora se ita kompara atu transfere pasiente husi nasional ba munisipiu, hau hanoin ida nee ladun valoriza ita nia dignidade nuudar nasaun,” hatete Eriximo ba jornalista sira iha nia knaar fatin Farol, Segunda (10/03/25).
Nia hateten, maske husi parte Governu nia observasaun katak, Hospital Atambua nia fasilidade sufisiente atu halo atendimentu, maibe atu haree lo-loos katak, hospital iha Atambua rasik nee laos nivel nasional, nee ita kompara nivel munisipal, iha Timor karik Hospital Referal.
Nia hatutan tan katak, serake iha Atambua rasik mos kuandu nia pasiente ruma moras grave baibain nee sira halo “rujukan” ba Kupang neeba, hanesan ibu kota propinsi, agora estranhu tebes mak ita Timor nasaun ida, iha Hospital Nasional boot halo fali transferensia ba referal, ida nee halo beik povu.
(EST 3)
