BAUKAU, STLTIMORLESTE.com – Kada fulan transporte publiku no privadu iha Munisipiu Baukau kontinua aumenta, husi oportunidade nee Diresaun Munisipal Transporte no Komunikasaun (DMTC – sigla português) Baukau, durante fulan 13 rekolha taxa hamutuk US$ 324.048,00 ba kofre estadu.
Husi taxa US$ 324.048,00, Diretor Diresaun Munisipal Transporte no Komunikasaun Baukau, Manuel Pinto da Costa informa, durante tinan 2025 tomak, Diresaun Munisipal Transporte no Komunikasaun Baukau halao atividade sira hanesan inspesaun ba transpote publiku no privadu, tranajekto publiku, trata karta konduzaun ba motorista sira no resjistu veikulu konsege rekolha taxa hamutuk US$ 295.595,00 husi total invois 17,209, enkuantu iha inisiu tinan 2026 fulan Janeiru rekolha taxa hamutuk US$ 28.453,00 husi total invois 1.850.
“Ita kompara tinan ida nee ho fulan janeiru nian nomos tinan 2025 janeiru nian, fulan ida nee aumentu makaas tanba ita nia transporte publiku privadu sira nee aumenta ba beibeik entaun ita nia reseitas ba nee diferente,” informa Diretor DMTC Baukau, Manuel Pinto da Costa ba STL iha nia knaar fatin Uatulete, Kinta (26/02/2026)
Nia kompara, iha inisiu tinan 2026 nee transporte publiku no privadu iha Munisipiu Baukau aumenta, tanba haree husi rezultadu taxa neebe mak rekolha iha fulan Janeiru 2025 husi atividade sira hanesan, halo inspesaun ba transpote publiku no privadu, tranajekto publiku, trata karta konduzaun ba motorista sira no resjistu veikulu iha deit US$ 27.160,00 ho total invois 1.613, enkuantu iha fulan Janeiru 2026 US$ 28.453,00 ho total invois 1.850 husi atividade hanesan.
“Ita kompara 2025 ho 2026 transporte aumenta ba beibeik, tanba ita nia komunidade sira prezisa transporte atu fasilita sira nia atividade entaun hotu hotu hola motor, kareta privadu no balu hola transporte publiku para halo negosiu, transporte publiku agora 109,” Manuel informa
Nia informa, transporte publiku neebe rejistu iha fulan Janeiru 2026 hamutuk 109 ho kode transporte hamutuk 26 daudaun halao movimentasaun no nia kobrementu hahu husi kapital Baukau too ona iha Suku no Aldeia sira neebe estrada kondisaun diak. Maibe kode ba transporte neebe estabelese nia konbrementu too ona iha Suku no Aldeia neebe estrada diak ona, DMTC Baukau hatan ba emprezariu nian (nain ba kareta) no Autoridade Suku nia ejizensia atu fasilita movimentasaun komunidade sira nian liu liu lori produtu lokal asesu ba merkadu.
Route ba transporte publiku neebe daudaun sirkula iha kapital Baukau mak hanesan kode A1 diresaun husi Terminal Vila Nova-Vila Antiga-Uainiki, A2 Terminal Vila Nova, Vila Antiga too Riamari, A3 Terminal-Teulale-Tasi, A4 Terminal-Kaibada Makasae-Buruma, A5 Terminal-Buibau-Samalari, A6 Terminal-Kaisidu-Uaiono-Waisa, A7 Terminal-Fatumaka BM, A8 Uatuwa-Gariuai Terminal.
Enkuantu kode transporte publiku B1 Baukau-Laga, B2 Baukau-Samaguia no B3 Baukau-Nunira-Lalulai-Sagadate. Kode transporte publiku C1 Baukau-Baguia-Afaloikai, C2 Baukau-Baguia-Larisula, C3 Baukau-Lavateri-Defawasi-Uakala, D1 Baukau-Kelikai, D2 Baukau-Laisorulai.
Kode transporte publiku E1 Baukau-Venilale, E2 Baukau-Ossu-Uailale, E3 Baukau-Venilale-Uaioli, E4 Berkoli-Ossoguigui, E5 Berkoli Veniduku, F1 Baukau-Vemasi, F2 Baukau-Loilubu-Ostiku, F3 Baukau-Uaigae, G Baukau-Kelikai Antigu no kode BC01 Baukau-Dili, BC02 Baukau-Lospalos inklui BC03 Baukau-Vikeke.
(tom)
