BAUKAU, STLTIMORLESTE.com – Trator kiik foun hamutuk 30 daudaun iha ona Servisu Agrikultura Munisipal, neebe hein governu entrega ba Autoridade Munisipal hodi halo distribuisaun.
Informasaun nee hatoo husi Diretor Servisu Ministeriu Agrikultura Munisipiu Baukau, Agostinho Ximenes ba STL iha knaar fatin Vila Nova, Kinta (24/10/2024).
“Trator kiik foun neebe agora mai hamutuk 30, maibe Ministru seidauk entrega ba Autoridade hodi distribui ba area potensia iha suku no grupu neebe iha,” nia dehan.
Nia sublina, bainhira governu liu husi ministeriu relevante entrega ona ba Autoridade Munisipal, sei halo distribuisaun ba area pontensial hortikultura nian, maibe parte suku ou grupu tenke halo pedidu ba parte Agrikultura hodi halo identifikasaun ba fatin hortikultura sira molok distribui.
Nia fundamenta, politika Governu liu husi Ministeriu distribui traktor refere, objetivu atu hasae volume produtu lokal hodi faan iha nivel merkadu nasional neebe bele fo rendimentu ekonomia ba familia, aleinde mos atu minimiza produtu importadu mai merkadu TL.
Iha fatin ketak, Xefe Suku Soba, Postu Administrativu Laga, Francisca Monica de Fatima apresia ho politika governu neebe hakarak ajuda setor hortikultura hodi hasae produtu hanesan modo, tomate no seluk tan iha rai laran nee diak, tanba bele hadia rendimentu ekonomia familia diak liu tan, bainhira faan produtu hirak nee iha merkadu.
“Ami sei halo proposta ida ba Governu para ami mos bele hetan, tanba iha ami nia suku iha mos komunidade sira kuda modo no seluk tan, maibe uza manual deit, nunee ami esforsu para hetan ida hodi ajuda sira,” nia hateten.
Lider Komunitariu nee mos rekomenda ba parte kompetente, bainhira halo distribuisaun ba nivel suku ou grupu, labele haree ba kor, tanba antes iha 2008 akontese ona governu apoiu hand traktor ba grupu sira iha Baukau, maibe daudaun la hetan nia paradeiru husi publiku iha nivel suku, tanba utiliza deit ba interese privadu.
(EST 2)
