BAUKAU, STLTIMORLESTE.com – Asidente trafiku nee akontese iha dader, loron 06 Setembru 2025, entre kareta trek ho trek iha estrada publiku diresaun Baukau-Dili area Lanud Baukau, neebe rezulta Segundu Sarjentu Aniceto Conceição da Costa mate fatin.
Vitima Salvador dos Santos konta, sira ho kareta trek sapa matrikula 60.595 tula rai henek iha mota Postu Administrativu Vemasi, objetivu atu lori ba Postu Venilale, maibe too iha area Ladun Baukau kareta avaria, nunee hodi para kareta refere iha estrada ninin ho maluk ida seluk toba hela iha kareta laran, tanba rai sei nakukun, maibe derepente hetan soke husi kareta trek sapa matrikula A.56-751 neebe matebian ho nia maluk ida utiliza nia diresaun husi Triloka ba Baukau Vila rezulta vitima nain 2 monu sai husi kareta laran inklui matebian Aniceto Conceição da Costa mate fatin no nia maluk seluk hetan kanek.
“Kareta para antes tiha ona, tanba nia difirensial mak ladiak, neebe para hela iha neeba kundotor ba fali uma, too ikus pas too tuku 6 soke kareta nia ulun tun vidru rahun ami rua monu sai husi oin, kareta husi neeba mai soke direta husi kotuk makaas,” hateten Salvador ba jornalista sira iha Sala emerjensia HoREX Baukau, Sabadu (06/09/2025).
Nia sublina, hafoin asidente nee akontese matebian ho nia maluk inklui vitima nain 2 seluk parte ambulansia Instituisaun FALINTIL-Forsa Defeza Timor Leste too kedas fatin hodi transporta ba Hospital Rejional Eduardo Ximenes (HoREX) Baukau, maibe Segundu Sarjentu Aniceto Conceição da Costa la konsege salva, tanba mate fatin.
Iha fatin hanesan, mediku iha sala emerjensia HoREX Baukau, Eduardo da Costa Filipe esplika, asidente entre kareta trek ho trek iha area Lanud Baukau sala emerjensia HoREX Baukau simu pasiente nain 4, nain 3 hetan kanek no nain 1 seluk hanesan Segundu Sarjentu mate fatin.
“Entre nain 3 nee sei observa iha nee ida pankada iha hirus matan, doutor espesialista ohin dader haree laiha tohar, sei observa hela iha nee, orsida diak nain 2 nee ami fo alta ona,” hatete Eduardo.
Tuir mediku nee katak, pasiente nain 2 husi Postu Administrativu Venilale neebe involve mos iha asidente nee hetan kanek, hanesan Joel Carlito Ximenes kanek iha parte inus no Salvador dos Santos hetan kanek iha oin laran, maibe kanek kmaan neebe parte mediku sira fo alta ona hafoin hetan tratamentu.
Enkuantu matebian nia maluk Manuel Aniceto da Silva idade 52 daudaun kontinua halao tratamentu iha sala emerjensia HoREX Baukau, tanba pankada makaas iha hirus matan ba volante kareta.
Entretantu observasaun STL nian iha sala mortuariu HoREX Baukau nota katak, mate isin Segundu Sarjentu Aniceto Conceição da Costa nian iha sala mortuariu HoREX Baukau hetan akompanhamentu husi maluk militar sira inklui mos familia neebe transporta kedas matebian nia mate isin ba rezidente Bairo Militar 200 Casas iha Lanud Baukau.
Matebian Aniceto Conceição da Costa husi Munisipiu Manatuto, moris iha loron 24 Abril 1988, involve aan iha vida militar daudaun nuudar Segundu Sarjentu destaka iha Komponente Forsa Terrestre Lanud Baukau no mate iha loron 06 Setembru 2025, tanba hetan asidente.
Jornalista: Tomas Reis
Editor: Xisto Mendonça
