DILI, STLTIMORLESTE.com – Tribunal Judisial Primeira Instansia Dili liu husi desizaun ba prosesu sumariu, deside absolve arguidu nain 3 husi krimi Ofensa ba Integridade Fizika Simples.
Prosesu ida nee lori mai iha Tribunal ho prosesu Sumariu, depois Juiz turnu haree katak, krimi neebe akuza ba arguidu nain tolu inisial D, O, M ho natureza semi publiku, tanba nee Tribunal halo tentativa konsiliasaun.
Iha tentativa konsiliasaun nee, lezadu nain 3 deside perdua arguidu nain tolu, maibe ho razaun iha futuru arguidu nain 3 labele halo tan krimi nee.
Iha sala julgamentu laran arguidu nain 3 deklara, sei la halo tan hahalok nee iha futuru, no husu deskulpa ba lezadu nain 3.
Tanba nee Tribunal liu husi Juiz Jumiati Freitas deside hodi absolve arguidu nain 3.
Tuir defeza arguidu sira nian, Eustaquio Guterres katak, prosesu nee lori mai Tribunal ho prosesu Sumariu.
“Mai ho prosesu Sumariu, tanba nee mak iha tentativa konsiliasaun lezadu sira aseita dada fila, tanba nee mak ikus mai Tribunal omologa hodi deside absolve arguidu nain 3,” dehan Eustaquio ba jornalista STL iha Tribunal Dili, Tersa nee.
Nia hatutan, kronolojia husi akontesimentu nee katak, momentu neeba arguidu nain 3 ho kondisaun lanu, la kontrola aan hodi halo agresaun fizika ba lezadu sira.
Defeza esplika, iha tentativa nee arguidu nain 3 mos promete ba Tribunal atu iha futuru la halo tan krimi hasoru lezadu ka ema seluk.
Prosesu nee prezide husi Juiz Jumiati Freitas, Ministeriu Publiku reprezenta husi Prokuradora Bemvinda do Rojario, arguidu hetan asistensia legal husi Defensor Publiku, Eustaquio Guterres.
(ter)
