DILI, STLTIMORLESTE.com – Tribunal Judisial Primera Instansia Dili absolve arguida ho inisial ACR hanesan feen boot, tanba Tribunal konsidera la provadu ba iha krime neebe Ministeriu Publiku akuza ba.
Desizaun neebe halao iha loron Kinta nee, Juiz prosesu Jose Gonsalves deklara katak, provadu arguida konfesa ba faktus katak, arguida nia laen mak lezadu ho inisial JMBF, maibe sira separadu ona, no momentu sira sepradu lezadu entrega hela karreta rua ba iha arguida atu buka moris sustenta sira nia oan nain 3 nia vida.
Provadu mos, karreta rua nee iha karreta baskolante ida, arguida mak konduz rasik hodi buka pasajeiru. No provadu mos katak, karreta rua refere momentu sosa arguida nia alin mane iha Korea mak aumenta tan osan, no osan neebe arguida nia alin mane aumenta momentu arguida no lezadu sei diak malu, sira devolve ona osan sorin ba.
Tribunal konsidera, provadu mos arguida troka dokumentus karreta nian ba iha arguida nia alin mane nia naran, ho razaun ida mak arguida ho nia laen fahe malu ona.
Tribunal tetu katak, razaun arguida troka dokumentus refere, tanba deit dokumentus karreta nian antes nee tau lezadu nia naran, arguida konsidera mos katak lezadu hanesan ona arguida nia eis laen, no ida mak lezadu hola ona feto kiik.
Tribunal haree katak, maske karreta refere arguida troka naran dokumentus ba iha arguida nia alin nia naran, maibe realidade arguida mak konduz karreta nee hodi buka osan, tanba arguida nia alin iha hela Korea.
Ho ida nee, Koletivu desidi la provadu arguida komete krime neebe Ministeriu Publiku akuza ba, tanba nee Koletivu desidi hodi absolve arguida husi krime refere.
Tribunal mos husu arguida atu la selu kustu judisial, tanba arguida hetan asistensia husi Defensor Publiku. Tribunal mos esplika ba iha arguida no lezadu atu la aseita ho desizaun nee, bele halo rekursu ba iha Tribunal Rekursu, prazu loron 30 depois de simu notifikasaun.
Tuir akuzasaun nebee iha, lezadu JMBF separa ona ho arguida hodi rai hela nia karreta kamioneta, marka Hino, matrikula A 52 196 ho Nisan Terano matrikula 20 3030 ba nia atu hodi sustenta familia nia moris.
Lezadu husik hela nia oan nain 3, lezadu nia oan husu osan ba lezadu no lezadu hatan dehan, rai hela karreta rua ba arguida hodi buka moris sustenta labarik nain 3 nia moris.
Arguida lori dokumentus karreta kamioneta marka Hino matrikula A52 196 ba iha DNTT hodi troka fali lezadu nia naran no tau fali arguida nia maun Marcelino Cena do Rego nia naran la iha konhesimentu husi lezadu neebe hanesan nain ba karreta.
Arguida hatene katak karreta nee lezadu nia propretaria, maibe nia lori ba troka fali karreta nia dokumentus hodi tau ema seluk nia naran.
Lezadu sente katak ho dokumentus ema seluk nian, lezadu sente karreta nee laos nain mak lezadu, maibe ema seluk nian.
Konsekuensia husi arguida nia hahalok nee, lezadu lakon nia propretaria neebe nia rasik mak sosa, no seidauk iha titulu transferensia ba ema seluk.
Arguida hatene karreta nee lezadu nia propretariu, maibe nia ba troka fali ema seluk nia naran, la iha konhesimentu husi lezadu hanesan nain.
Arguida halo krime ho livre, deliberada konsentemente no hatene katak hahalok nee lei bandu no kastigu tuir lei.
Arguida hanesan autor material ba krime Falsifikasaun Dokumentus ka Notasaun Teknika neebe previstu iha artigu 303 agravasaun iha artigu 304 husi KP.
Audensia julgamentu nee prezide husi Juiz Koletivu, Jose Gonsalves, Jumiaty Freitas, Joao Ribeiro, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Marsal Mascarinhas.
(ter)
