DILI, STLTIMORLESTE.com – Tribunal Judisial Primeira Instansia Dili (TJPID) adia hikas desizaun kona-ba kazu osan subvensaun Partidu KHUNTO nian ba loron seluk.
Antes nee Tribunal marka ona atu lee desizaun iha loron 4 fulan Novembru oras tuku 5 loraik. Maibe Tribunal la konsege lee desizaun no adia hikas ba iha loron 7 oras tuku 9 dader hodi lee sai desizaun Tribunal nian.
“Tribunal adia desizaun nee ba iha loron 7 oras tuku 9 dader, “dehan fontes konfirmadu.
Prosesu refere, Tribunal rona ona deklarasaun husi arguidu nain ida, no arguidu nain rua hili direitu nonok. Tribunal mos rona sasin sira neebe arola husi Ministeriu Publiku (MP) tanba nee ikus mai Tribunal husu ba iha parte MP no defeza atu tama ba iha alegasaun.
Ante nee iha alegasaun, Ministeriu Publiku neebe hanesan Prokurador ba iha prosesu, Rafael Gusmao deklara katak, maske arguidu nain rua hili direitu nonok, maibe arguidu nain ida konfesa ba faktus.
Tanba nee, bazeia ba deklarasaun husi arguidu nain ida, no mos sasin sira neebe arola, komprova mos ho dokumentus neebe iha, Ministeriu Publiku husu Tribunal atu aplika pena multa ba arguidu nain tolu, ba arguida ABdS pena multa rihun US$ 5, arguidu JdSNB pena multa rihun US$5 no arguidu MdRMV pena multa rihun US$ 5, husi sira nain tolu hamutuk rihun US$15.
Enkuantu defeza husi arguidu sira nian, Advogadu Privadu Ismael Asunsao Lopez deklara katak, antes nee iha julgamentu arguidu nain rua hili direitu silensiu, iha arguidu MdMRV maka hili direitu koalia. No arguidu deklara, momentu neeba arguidu halo duni relatoriu, maibe rekonese iha erru balu, tanba foin primera vez halo relatoriu.
No prazu neebe CNE fo, arguidu konsege justifika relatoriu neebe iha maibe la klaru, maka ikus mai akontese nunee.
Defeza deklara, arguidu sira devolve ona osan rihun US$ 7 , tanba nee husu Tribunal Tetu sirkunstansia hotu, atu aplika pena neebe justu.
Defeza mos husu Tribunal, atu notifika ba iha CNE, hodi devolve hikas osan subensaun partidu KHUNTO nian, nebee suspende iha tinan 2022 too iha tinan 2023.
Tuir faktus katak, arguida ABdS hanesan lider maksimu iha Konselhu lideransa Nasional P. KHUNTO.
Arguidu JdSNB hanesan Konselheiru no peritus ba iha P-KHUNTO.
Arguidu MdRMV nudar Diretor Ezekutivu iha Partidu KHUNTO, responsavel ba iha prepara dokumentu sira akumula ho exekusaun fundus iha P-KHUNTO ba iha Komisaun Nasional Eleissun.
Iha tinan 2021 Parlamentu Nasional aprova orsamentu subvensaun publiku ho montante Global US$ 6,000,000.00, no trasfere ba partidu KHUNTO no montante US$ 461,538.46, ho baze reprezentasaun iha Parlamentu Nasional PN.
Iha tinan 2022 MS asumi knaar hanesan tezoreira partidu KHUNTO maibe, hahu iha loron 28 fulan Abril tinan 2023 to ba loron 21 fulan Abril tinan 2024, tezoreira partidu KHUNTO mak MdA, truka MS.
Tezoreira sira iha poder halo movimentu ba konta hamutuk, no arguida ABdS hanesan Prezidente Partidu KHUNTO.
Maibe MS ho MdA depois asina cek no efetua levantamentu osan subvensaun publiku bajeia ba ordem neebe hatun husi responsavel Partido KHUNTO hodi imediatu entrega ba arguidu JdSNS, nudar Konseleru maximu ho arguidu MdRMV hanesan Direktor Ezekutivu iha Partidu KHUNTO.
MS ho MdA, sira rasik la hatene no laiha kunhesimentu nem iha dokumentu komprovativu konaba ezekusaun osan subvensaun publiku neebe PN aprova no transfere ba konta Partidu KHUNTO.
Responsavel partidu KHUNTO aprezenta relatorio ezekusaun fundus subvensaun publiku tinan 2021 tinan 2022 ba CNE, la aprezenta ho dokumentus komprovativu konaba utilizasaun fundus refere.
Fundus subvensaun publiku no montante US$ 62,000.00 (rihun nenulu resinrua dolar amerika) laiha dokumentus komprovativu konaba utizasaun.
Arguidu sira efetua pagamentu sira uza fundus subvensaun publiku, maibe sira rasik la aprezenta dokumentus komprovativu konaba montante US$ 62,000.00 entrega entidade ida neebe.
Hahalok refere arguidu sıra komete hanesan reprezentante legal iha partidu KHUNTO sira rasik viola artigu 12° husi Lei n.º 6/2008 de 16 d abril, Regime Juridico do Finaciamento das partidos Politicos.
Arguidu sira mesmu CNE fo ona prazu atu justifka maibe sira nafatin lakoi kolabora hodi rejulta osan ho montante US$ 62,000.00 (rihun nennulu resinrua dolar amerika) laiha justifikasaun ba utilizasaun.
Arguidu sira atua ho forma livre, deliberada no konsiente, hatene diak katak hahalok refere proibi tuir lei maibe sira la hapara hodi rejulta prestasaun konta la ho justifikasaun.
Ho nune arguidu hanesan, JdSNB, ABdS ho MdRMV, nudar autor material ho forma ba pratika krimi ida Inkumprimentu ba regras kontabilitas organizasaun neebe previstu no punidu iha artigu 21° numeru 1 Lei n.º 6/2008 de 16 d abril, Regime Juridico do Finaciamento das partidos Politikus.
Audensia julgamentu nee, prezide husi Juiz Singular Jumiati Freitas, Minieteriu Publiku reprezenta husi Prokurador nain ida, arguidu nain tolu hetan asistensia legal husi Advogadu Privadu, Ismael Asunsao Lopez, no Agustinho de Jesus.
Jornalista: Terezinha De Deus
Editora: Carme Ximenes
