DILI, STLTIMORLESTE.com – Tribunal Judisial Primeira Instansia Dili adia kazu Parlamentu Nasional neebe komete husi arguidu nain tolu, inklui eis Prezidente Parlamentu Nasional.
Iha prosesu ida nee arguidu hamutuk nain haat mak hanesan arguidu ANJCA , AVC, AAJ no GSMN.
Iha sala julgamentu laran loron Tersa nee (03/05/2025) Juiz Prosesu Ana Paula deklara katak, Tribunal adia julgamentu refere, tanba prosesu refere iha arguidu nain haat maibe arguidu nain tolu la marka prezensa, aleinde razaun ida mak husi parte defeza arguidu sira nian husu Tribunal halo uluk debate instrusaun ba kazu nee molok avansa ba julgamentu.
Tanba nee mak Juiz prosesu deside adia hikas prosesu nee ba iha loron 20 fulan Outubru tinan oin 2026 hodi halo julgamentu.
Tuir faktu katak, akontese prosesu nee iha momentu neebe arguidu nain haat sei asumi kargu, arguidu ANJCA hanesan Prezidente Parlamentu Nasional iha tinan 2018 too tinan 2020. Arguidu AVC hanesan Xefe Gabinete PPN husi tinan 2018 to tinan 2020, arguidu AAJ hanesan Sekretariu Jeral PN husi tinan 2019 ate a data, no mos arguidu GSMN hanesan asesora PPN husi tinan 2018 to tinan 2020.
Prosesu refere ligadu ho arguidu ANJCA neebe ba halo tratamentu saude iha Singapura. Arguidu sira tuir lo-loos labele aprova pedidu atu prosesa fundu rezerva tanba viajen arguidu ANJCA hanesan pesoal, laos viajen ofisial.
Maibe ikus mai arguidu sira prosesa kona-ba orsamentu ba halo tratamentu nian, inklui perdiem ba ekipa teknika sira neebe akompanha arguidu ANJCA ba halo tratamentu iha Bali.
Tanba nee ikus mai Ministeriu Publiku akuza arguidu nain haat hanesan ko autor material ba krimi abuzu poder neebe previstu iha artigu 297 husi Kodigu Penal.
Prosesu adiamentu nee prezide husi Juiz Koletivu, Ana Paula, Jose Maria, Ersilia de Jesus, Ministeriu Publiku subtitui husi Prokurador Matias Soares, akompanha husi Defensor Publiku Eustaquio Guterres.
(ter)
