BAUKAU, STLTIMORLESTE.com – Tribunal Distrital Baukau (TDB) aplika prizaun preventiva ba autor taa vitima nain 2 iha Suku Samalari, Postu Administrativu Baukau Vila, Munisipiu Baukau.
Kazu refere akontese iha loron 14 Outubru 2024 kalan, neebe vitima SDCF hetan kanek grave iha ulun parte karuk no EF idade 52 hetan kanek kmaan iha parte liman kabaas karuk, tanba hetan taa.
Hafoin kazu nee akontese, iha loron 15 Outubru parte dader, Komando Polisia Munisipiu Baukau liu husi Servisu investigasaun Kriminal identifika suspeitu nain 5 ho inisial EO idade 68, RS 27, ERF 23 JAB 24 no MM 22 hodi prosesu liu husi rejistu iha Ministeriu Publiku neebe kontinua kedas primeiru interogatoriu iha loron 17 no rona dezisaun final iha loron 18 Outubru 2024, iha Tribunal Distrital Baukau.
“Primeira interogatoriu sira nain 5 ida mak rekonhese dehan taa, nain 4 nee dehan la involve, maibe ema mak mai atake sira, entaun sira nain 4 provizoriu aprezentasaun priodika, ida mak ba prizaun preventiva para fasil tuir investigasaun,” hateten parte Defensor Publiku, Jermano Guterres Ramos ba jornalista sira iha resintu TDB hafoin remata primeiru interogatoriu, Sesta (18/10/2024).
Durante prosesu primeira interogatoriu autor nain 1 seluk deklara faktus hotu, nunee TDB aplika prizaun preventiva ba autor prinsipal, enkuantu nain 4 seluk aplika aprezentasaun priodika.
Parte defeza deklara, medida neebe TDB aplika ba sidadaun nain 5 refere, nuudar meuis ida atu asegura autor nia vida no aplika aprezentasaun priodika, nain 4 seluk atu labele hamosu involve iha krime ruma.
Enkuantu ba kazu refere rejistu ho numeru Nuc.0167/24.BCBCV neebe iha prosesu primeira interogatoriu prezide husi juiza Sribuana da Costa, reprezentante Ministeiru Publiku husi Prokurador Ambrosio Rangel Freitas no Defeza husi Defensor Publiku Jermano Guterres Ramos.
(EST 2)
