DILI, STLTIMORLESTE.com – Tribunal Rekursu (TR) fo sai rezultadu ligadu pedidu fiskalizasaun abstrata kona-ba sirkular Ministeriu Saude (MS) hodi bandu Profisional Saude sira halao servisu iha klínika privadu nee inkonstitusional, maibe Ministra Saude la obedese, hatan ba kestaun nee Primeiru Ministru hatete, desizaun MS nee moral nia.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halao enkontru ho Prezidente Republika, Jose Ramos Horta iha Palasiu Prezidensial Nikolao Lobato, Bairo Pite, Kinta (24/07/2025).
Tribunal deside karta sirkular husi MS inkonstitusional, maibe Ministra Saude la obdese ba desizaun husi Tribunal, oinsa Primeiru Ministru nia haree ba kestaun nee, hatan ba kestaun nee Primeiru Ministru hatete, labele koalia konaba konstitusional ka inkonstitusional, maibe nee moral.
“Hau dehan ida nee ita lalika koalia kona-ba konstitusional ka inskonstitusional, maibe nee moral, tanba atan oan hau sai doutor laos atu manan osan, iha misaun ida atu kura, tanba nee mak iha buat ida, ama STL mai konsulta iha hau dehan ulun fatuk moras, depois halo reseita dehan ba hola iha hau nia klimika, kuandu loloos nee cek moras ulun nee tanba saida moras ka oinsa nee lae, nee la kumpri ona nia misaun, se nunee ema hotu bele,” katak PM.
Primeiru Ministru hatete, bainhira pasiente ida ba halo tratamentu mediku halo cek pois laos fo aimoruk, maibe hakerek reseita haruka pasiente ba sosa aimoruk iha klinika pribadu, ida nee la tuir ona misaun neebe nia halo.
Se juis mos bele, nia servisu hanesan juis ba servisu advogadu, ida bele ba fali servisu, ida nee ita temi liu ba moral, se konstituisaun dehan bele tribunal konstitusional dehan bele, hau servisu hanesan Primeiru Ministru loraik nee hau ba servisu iha neebe, kalan hau servisu para bele hetan osan too, neebe ita nia tribunal kapaas los,” katak PM Xanana.
Primeiru Ministru hatete, se tribunal dehan inkonstitusional entaun juis sira mos bele ba halao servisu iha fatin oin-oin atu hetan mos osan, maibe kuandu atu hadia kualidade ensinu iha universidade, maibe profesores la tama barak maibe dosente bele ba hanorin fatin hotu hotu, komu hanorin fatin barak entaun ba haruka estudante loke google laos hanorin.
Molok nee Ministra Saude, Elia Dos Reis Amaral hatete, Ministeriu Saude sei la dada nia karta sirkulasaun neebe mak bandu mediku sira halao pratika iha klinika privadu sira, tanba maioria mediku sira neebe mak halao knaar iha klinika privadu nee investimentu husi Ministeriu Saude nian.
“Hanesan responsavel masimu ba iha area saude nian, respeita ba desizaun tribunal maibe sei la hamate ou la halakon programa neebe trasa tiha ona iha IX Governu Konstitusional, entaun kuandu profisional saude sira nee hotu sira presiza atu retournu iha fatin atu nune bele fo kontribuisaun ba ita nia rain,” dehan Ministra Saude, Elia dos Reis Amaral.
Nia dehan, kona-ba desizaun tribunal nee los, entidades hotu-hotu iha lei nia okos, maibe se iha komitmentu nafatin la dada fali sirkulr nee.
(eme)
