DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interogatoriu, deside hodi aplika medida tolu ba iha arguidu nain sanulu (10) hanesan sidadaun estranjeiru ho inisial BJT, AJ, JD, KK, JO, MR, PG, MIS, YA no YMK.
Arguidu sira lori mai iha Tribunal, Juiz turnu Ana Paula halo tiha indentifikasaun ba arguidu nain 10, ikus mai deside hodi aplika medida tolu ba iha arguidu nain 10, hanesan medida Aprezentasaun Periodika, proivisaun de auzensia no kausaun.
“Tribunal aplika medida tolu, primeru maka medida kasaun dez mil ba sira nain 10 kada ema ida mil total dez mil, no aplika medida Proivizaun de auzensia signifika, katak labele sai husi nee, no medida Aprezentasaun Periodika kada semana ida dala rua iha loron Segunda no Kinta atu aprezenta an iha Ministeriu Publiku,” dehan Advogadu Privadu, Napoliao de Olivera Carvalho, ba Jornalista sira, iha Tribunal, Dili, Segunda (14/10/2025).
Tuir nia, koasaun nee hanesan garantia ba prosesu nee, tanba sira hanesan ema estranjeiru karik sira halai sai husi Timor, osan kausaun neebe iha sira labele foti no sei ba iha Estadu, tanba kausaun hanesan hipoteka ida hodi asegura prosesu nia andamentu.
Maibe iha alegasaun husi parte Ministeriu Publiku nian husu Tribunal atu aplika medida Prizaun Preventiva ba arguidu nain 10. Enkuantu husi parte defeza nian husu Tribunal atu aplika medida Aprezentasaun Periodika, no medida kausaun. Tanba nee ikus mai Tribunal aseita ho medida rua neebe Defeza husu, no Tribunal aumenta tan medida Aprezentasaun periodika.
Prosesu nee, prezide husi Juiz turnu Ana Paula, Ministeriu Publiku reprezenta husi Prokurador Rafael, arguidu sira hetan asistensia legal husi Advogadu Privadu Napoliao de Olivera Carvalho.
Tuir kronolojia katak, Autoridade Seguransa, Polísia Nasional Timor-Leste (PNTL) liu husi Diresaun Servisu Investigasaun Kriminál (DSIK), halo operasaun sobu jogu Online iha area Fatuhada no Kolmera konsege detein sidadaun estranjeiru nain 10.
Durante operasaun PNTL-DSIK fahe ba ekipa rua iha loron (09/10) tuku 11:30 kalan konsege identifika hetan sidadaun estranjeiru hamutuk ho traballador Timoroan Feto no Mane lubuk ida, halao hela atividade jogu online iha area Fatuhada no Kolmera.
Hafoin ekipa PNTL-DSIK indentifika hetan aktividade jogu Online nee halo kedas atuasaun kaer ho liman konsege asegura detein kedas sidadaun estranjeiru nain-10 ho trabalhador Timoroan Feton no Mane kuaze nain 40 resin, ho evidensia sira hodi transporta kedas ba edifisiu Diresaun Servisu Investigasaun Kriminal (DSIK) nia fatin, iha kuartel Jerál PNTL, Kaikoli hodi submete ba prosesu indetifikasaun.
Sidadaun estrajeiru nain 10 neebe kumpri hela sela detensaun, kompostu husi nain-6 hanesan resposavel masimu ba jogu Online iha area Fatuhada ho naran inisial BJT, AJ, JD, KK, JO no MR nee rejista ho Nuk. 0323/25.PNSIC no nain haat neebe resposavel masimu ba jogu Online iha area Kolmea ho naran inisial PG, MIS,YA no YMK ida nee mos rejista ho Nuk. 0324/25.PNSIC.
Atividade jogu online neebe sidadaun estranjeiru loke durante nee halo rekrutamentu ba sidadaun Timoroan Feto no Mane hodi halo servisu utiliza telemovel ho operador Sim Card rua hanesan Telemor ho Telkomcel, hafoin manda mesajem ho maneira oin-oin ba ema seluk bele fiar sira ikus mai Haruka ema manda osan ba sira nia konta bankaria hodi hetan benefisiu ba sira nia aan.
Jornalista: Terezinha De Deus
Editora: Carme Ximenes
