DILI, STLTIMORLESTE.com – Tribunal Judisial Primeira Instansia Dili halao re julgamentu ba iha kazu omisidiu neglijente, neebe rezulta vitima Zizelma Maria Fatima Verdial Gonsalves lakon vida.
Iha sala julgamentu laran, arguidu MSC hili direitu nonok, tanba nee Tribunal kontinua rona sasin neebe arola husi Ministeriu Publiku no parte asistente nian.
Iha sala julgamentu laran sasin Nelia Maria da Roza Verdial de Araujo deklara katak, relasaun ho vitima hanesan nia prima rasik, no sasin hela iha Delta 3, momentu neeba vitima ba iha sasin sira nia uma Delta 3 sei konversa ho sasin nia inan no aman, depois vitima mos fila fali ba iha vitima nia uma iha Delta 2.
Sasin deklara, kona-ba prosesu soke vitima sasin la iha konhesimentu, maibe sasin rona deit tarutu no halai sai ba haree vitima latan hela iha estrada.
Sasin deklara, momentu neeba vitima sai husi sasin sira nia uma lao la too minutu ida, derepente sasin rona tarutu, sasin halai sai mai haree vitima latan hela iha estrada ho kondisaun toba taka rabat ba rai.
Sasin deklara, sasin hamriik no bolu dehan Zezilma maibe vitima la hatan, no sasin haree ema barak komesa mai haree no raan sai barak husi vitima nia ulun ho trauma sasin halai ba hasai vitima nia telefone atu kontaktu, maibe sasin haree kareta ida para hela iha fatin neeba, sasin mos husu ajuda hodi tula vitima lori ba Ospital Sentru Saude Komoro no ikus mai lori too ba iha HNGV la konsege salva vida.
Sasin deklara, vitima ultrapasa duni zebra kros, maibe sasin haree tuir video neebe iha, sasin la haree diretamente, no sasin ba foti vitima nia telefone sasin haree vitima la book aan ona, no kona-ba arguidu sasin la haree, maibe sasin haree motor ida monu duni iha fatin akontesimentu.
Tuir sasin, iha vitima nia maun Zibo Verdial no vitima nia primu Niquito Verdial mak tula vitima ba kareta, hodi lori ba iha hospital.
Sasin deklara, momentu vitima tula tiha ba kareta hodi lori ba hospital sasin mos la konsege ba hamutuk ho kareta neebe tula vitima, tanba sasin hatais hela ropa uma nian, depois sasin fila tiha ba uma troka tiha ropa no kontaktu ba vitima nia maun sira katak vitima evakua ba iha HNGV. Tanba nee sasin mos ba uluk iha HNGV hodi hein, banhira ambulansia lori vitima tama ba, sasin tuir ba haree doutor sira halo hela tratamentu ba vitima maibe sasin la iha forsa hodi haree, no sasin sai mai hein tiha iha liur no liu tiha minutu balu sasin rona dehan vitima iis la iha ona.
Tribunal konfirma kona-ba primeiru sasin rona tarutu halai sai mai ba kaer vitima nia isin ka lae, sasin deklara sasin ho trauma tanba nee la kaer vitima nia isin maibe foti deit telefone.
Aleinde nee Tribunal mos konfirma kona-ba kareta neebe tula vitima lori ba iha hospital sasin deklara katak, la hatene kareta nee mai husi neebe, kareta nee se para antes ona ka para depois de vitima monu, ka kareta nee sosa sasan iha Loja Funan Buras ida nee sasin la hatene, sasin haree mak kareta nee para hela iha estrada ninin hodi husu ajuda tula Zizelma lori ba hospital.
Iha prosesu nee Tribunal hasai ordem ba loja Funan Buras no Toto Bola atu aprezenta video iha CCTV, liu-liu video iha loron akontesimentu nee.
Prosesu nee prezinde husi Juiz Jose Gonsalves, Ministeriu Publiku reprezenta husi Prokurador Rafael Gusmao no asistente Eustaquio Guterres no arguidu hetan asistensia legal husi Advogadu Privadu Americo.
Antes nee Tribunal Judisial Primeira Instansia Dili liu husi desizaun ba iha prosesu sumariu, deside hodi aplika pena prizaun tinan 3 suspende tinan 4 ba arguidu ho inisial MSC, no indemniza ho osan US$ 5 mil.
Tanba nee mak familia la aseita hodi liu husi asistente no Prokurador halo rekursu ba iha Tribunal Rekursu hasoru desizaun Tribunal Primeira Instansia nian.
Nunee iha loron 26/06/2025 Tribunal Rekursu hasai desizaun ida, hodi notifika ba iha parte sira katak, ba prosesu ida nee TR deside hodi halo re julgamentu fali.
Jornalista: Terezinha De Deus
Editora: Carme Ximenes
