DILI, STLTIMORLESTE.com – Tribunal Judisial Primeira Instansia Dili (TJPID) liu husi Juiz Koletivu halao julgamentu ba arguidu inisial AdC, neebe komete krimi tolu hasoru nia feen LDF.
Iha sala julgamentu laran arguidu konfesa ba faktus katak, iha momentu akontese problema nee arguidu no ofendida fila husi kampus, arguidu bolu ofendida tama ba kuartu laran mak basa ofendida dala ida, maibe ida nee hanesan hanorin ofendida no laos atu intensaun basa ofendida.
Arguidu deklara, kona-ba rasta no foti tudik atu sona no mos buti kakorok nee lalos.
Arguidu deklara, depois de akontese tiha problema, liu tiha fulan ida sira kontinua diak malu fali, no husi neeba too mai agora la akontese tan problema ona, tanba arguidu arepende tebes ba nia hahalok nee.
Aleinde nee, ofendida deklara ba Tribunal katak, iha momentu neeba, akontese duni problema no arguidu lori tudik ameasa ofendida no basa dala ida, nune ofendida haree arguidu lori tudik atu sona iha hirus matan, mak ofendida halai sees.
Ofendida deklara, arguidu lori duni tudik ameasa atu sona ofendida, maibe ofendida hakarak dada fali krime ameasa nee, tanba relasaun ho arguidu hanesan fen no laen e sira diak malu ona.
Rona tiha arguidu no ofendida, Juiz prosesu husu atu tama kedan ba iha faze alegasaun.
Liu husi alegasaun neebe iha, Ministeriu Publiku (MP) husu Tribunal atu kondena arguidu pena prizaun tinan rua no suspende tinan 3. Nunee parte Defeza husu Tribunal, aplika pena neebe mak justu ba arguidu.
Hafoin alegasaun ofendia husu Tribunal atu dada fali kazu ameasa. Tribunal deklara katak, ba krime Ameasa bele dada fila, maibe ba krime Violensia Domestika labele dada fila.
Rona tiha alegasaun, Tribunal deside tama kedan ba iha faze leitura akordaun.
Iha leitura nee ba krime Ofensas Integridade Fizika Simples ho forma Violensia Domestika, Tribunal aplika pena multa 120 dias, kada loron arguidu selu US$0,50 Sentavus, bainhira arguidu la selu mak ba kadeia durante loron 80.
Ba iha krime Arma Branka Tribunal fo pena suspensaun ba arguidu, maibe Tribunal mos fo hanoin durante periodu suspensaun labele pratika tan krime.
Iha faktus katak, iha loron 7 fulan Fevereiru tinan 2023, haleu oras tuku 19:00, otl, iha Madohi, Dili, arguidu AdC lori liman basa ho makas dala ida kona, iha lezada nia hasan sorin loos, hafoin arguidu ba foti tudik modo nian ida ho medida sentimetru 30 kaer iha liman, lori liman buti lezada nia kakorok no lori tudik atu sona iha lezada nia hirus matan mak lezada hakilar no hisik aan halai sai tiha ba liur.
Konsekuensia direta husi arguidu nia hahalok, lezada hetan moras makas iha hasan sorin loos, bubu no mean, kanek risku. Lezada ba halo tratamentu iha PRADET.
Kauza hosi problema nee, tanba lezada haruka arguidu atu sosa susu bem no sun ba labarik, maibe arguidu obriga lezada atu fo deit bee, ba sira nia-oan, nunee sira deskuti malu hodi mosu problema nee.
Konstitui arguidu nuudar autor material ho forma konsumadu ba pratika konkursu krime 3, krime ofensa ba integridade fizika simples ho forma violensia domestika 1 (ida), previstu no punidu tuir artigu 145º husi Ködigu Penal konjuga ho artigu sira 2, 3 alinea a) no artigu 0350 alinea b) hosi Lei Kontra Violensia Doméstika n.º 07/2010, loron 07 fulan Julhu, krime ameasa 1 (ida), previstu no punidu tuir artigu 157 hosi Kódigu Penal no artigu sira 2º nº 1, al. b) no nº 2, al. g) ho 20º, hotu-hotu husi Lei Nú. 5/2017, loron 19 fulan Abril, kona-ba Rejime Juridiku Prátika Artes Marsiais, Rituais, Armas Brankas, Rama Ambon No 50 Alterasaun Ba Kodigu Penal.
Audensia julgamentu nee, prezide hosi Juiz kolektivu Ana Paula, Ercilia de Jesus, Juiz Estajiadu nain ida, no Ministeriu Publiku reprezenta husi Prokurador, Napoleão da Silva, no arguidu hetan asistensia legal husi Defensor Publika estajiaria nain ida.
Jornalista: Terezinha De Deus
Editora: Carme Ximenes
