DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial REA hanesan maun, tanba komete krime hasoru lezadu inisial AEF hanesan alin rasik.
Tuir akuzasaun katak, ofendidu AEF hanesan arguidu nia alin rasik hela hamutuk iha uma ida iha Bekora.
Iha loron 13 fulan Maiu tinan 2024 arguidu hamutuk ho ofendidu ho familia balu hemu tua iha uma.
Hafoin ho kondisaun lanu ofendidu foti save motor nian atu sai, arguidu la fo save motor nian, maka arguidu ho ofendidu tuku malu, maka arguidu la satisfaz ho hahalok ofendidu nian, arguidu halai tama ba uma laran foti tudik modo nian ida hodi sona kedas ba ofendidu maka ofendidu lori nia liman tahan netik, maka kona fali iha ofendidu nia liman fuan rua parte klaran nian, no sona tan dala ida iha parte kakorok nian halo kanek.
Konsekuensia husi arguidu nia hahalok, halo ofendidu sente kanek.
Tanba nee, Ministeriu Publiku (MP) akuza arguidu komete krime Arma Branka.
Hatan ba akuzasaun neebe iha arguidu deklara katak, kona-ba kaer tudik sona nee loos, konaba loron akontesimentu mos loos, no tudik neebe arguidu sona lezadu tudik ida neebe babain tau iha uma hodi koa modo.
Arguidu rekonhese, lori tudik sona kona iha kakorok, maibe agora lezadu ho arguidu diak malu ona. Motivu akontese, momentu neeba sira hemu lanu, arguidu foti save atu sai ho motor, lezadu hadau fali save motor maka mosu diskusaun, hodi ikus mai arguidu sona lezadu.
Arguidu konfesa imparsial ba faktus, tanba nee Tribunal husu ba iha Ministeriu Publiku (MP) atu tama ba iha alegasaun.
Iha alegasaun Prokurador Bartolomeo De Araujo deklara katak, arguidu konfesa imparsial ba faktus, tanba nee faktus sira neebe iha provadu hotu, tanba nee husu Tribunal atu aplika pena prizaun ba arguidu.
Aleinde nee, Defeza arguidu nian Henrique Mariz deklara katak, arguidu arepende ona nia aktu, momentu neeba hemu tua lanu la kontrola an ikus mai mosu dezentendimentu, no sira rejolva ona husu husi neeba mai too agora la akontese tan.
Arguidu mos promete sei la halo tan aktu neebe iha, tanba nee Defeza husu atu aplika pena suspensaun.
Prosesu nee, prezidente husi Juiz Kolektivu, Jumiati Freitas, Jose Gonsalves, Jose Quintao, Ministeriu Publiku reprezenta husi Prokurador, Bartolomeo de Araujo, arguidu sira hetan asistensia legal husi Defensor Publiku, Henrique Mariz.
Jornalista: Terezinha De Deus
Editora: Carme Ximenes
