DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial DdS, tanba komete krime rua.
Tuir akuzasaun katak, entre tinan 2018 ou 2019 nia laran, lezada CPLFA nia laen HBCCC sosa karreta Triton ida, kor sinzentu, xapa matricula CLS. 2124 husi nia kolega.
Sosa tiha hotu troka fali naran (balik nama) dokumentu karreta nian tau lezada CPLFA nia naran. Antes dia 18/10/2021, lezada nia laen fo konfiansa ba lezada nia maun maka baibain fo karreta nee ba ema aluga buka osan.
Iha loron 18/10/2021, lezadu nia maun no subrinnhu maka halo akordu aluger ho arguidu iha lezada nia maun nia uma iha Taibesi.
Tanba nee maka kona-ba konteudu akordu aluger ba karreta ne, lezada rasik lahatene, maibe lezada nia maun maka hatene liu.
Mesmu nunee, lezada iha kuinesementu oituan katak, arguidu aluga kareta nee durante loron 31, no kada loron selu US$100 (dolar atus ida).
Iha loron 24/11/2021, foin arguidu halo pagamentu prestasaun metade (husi kontratu loron 31 nian ho osan US$3. 500), no kontinua la selu too agora, ikus mai arguidu ba pinora tiha lezada nia karreta refere ba ema Lospalos ida hela iha Tasi Tolu-Dili.
Desde karreta nee iha arguidu nia liman too agora hamosu prejuizus ba lezada ho nia familia, no afeta mos ba sira nia negosiu tanba sira depedente deit ba sira nia karreta refere.
Lezada rasik la hatene osan hira tan maka arguidu tenke selu husi aluga nee, tanba konaba-osan, lezada nia maun maka hatene liu, tanba nia maka halo kontratu ho arguidu.
Konforme lezada nia maun hateten ba nia katak, karreta nee ema ida maka konduz hodi halai iha Dili karan, tanba nee husu atu fo fila lezada ninia karreta refere hodi halao ninia negosiu.
Lezada nia maun, testemunha deklara katak, iha dia 18/10/2021, tuku 08:00 arguidu ho lezada selebra akordu aluger kareta iha testemunha nia uma iha Aldeia My Friend, Taibesi-Dili.
Iha mumentu nee arguidu dehan ba nia katak karreta nee NGO elan Internasional maka aluga, maibe liu husi arguidu.
Arguidu ho intensaun hodi maneira lohi no bosok hodi dezafia no abuza konfiansa neebe maka testemunha depozita ba nia liu husi akordu aluger karreta.
Konsekuensia husi konduta arguidu nian, halo lezada CPLFA hetan prejuizu osan US$4.700 (dolar rihun hat atus hutu).
Tanba nee, arguidu DdS hanesan autor material ho forma konsumadu, hodi pratika iha konkursu krime rua, “abuza konfiansa agravadu no Burla agravadu neebe previstu no punidu tuir artigu 267º n. 1 al. a,b,c), artigu 257º n. 1, 35° hotu-hotu husi Kodigu Penal.
Hatan ba akuzasaun nee, arguidu deklara iha sala julgamentu katak, akuzasaun neebe iha loos hotu.
Arguidu deklara, kona-ba osan ida aluga nian arguidu selu ona uitoan uitoan, no karreta arguidu entrega tiha ona, no arguidu promete sei selu hotu osan restu neebe iha.
Arguidu mos arepende ba nia hahalok nee, no promete sei la halo tan iha futuru.
Aleinde nee lezada deklara katak, kareta neebe arguidu lori ba entrega ho kondisaun aat, no osan quatro mil sete sentos tuir kontratu neebe iha, no arguidu devolve ona osan 4 mil sete sentos dolar hela restu, hela seisentos.
Rona tiha arguidu, Tribunal husu atu tama ba iha faze alegasaun.
Iha alegasaun Prokurador deklara katak, iha krime rua maka akuza ba arguidu, tanba nee MP husu Tribunal atu aplika pena prizaun tinan tolu resin ba arguidu.
Enkuantu defeza haree katak, arguidu devolve ona osan, kolabora ho justisa, tanba nee husu atu aplika pena suspensaun ba iha arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Fransisca Cabral, Jose Escurial, Juiz Estajiadu nain ida, Ministeriu Publiku reprezenta husi Prokurador, Bartolomeo de Araujo, arguidu hetan asistensia legal husi Defensor Publiku, Juvinal Dias.
Jornalista: Terezinha De Deus
Editora: Carme Ximenes
