DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial DS, tanba deskonfia komete krimi rua.
Juiz turnu Fransisca Cabral halo tiha indentifikasaun ba arguidu, no ikus mai deside hodi aplika medida Aprezentasaun Periodika (AP) ba arguidu.
“Tribunal deside aplika medida Aprezentasaun Periodika ba arguidu, atu aprezenta aan iha postu Polisia neebe hela besik ba fulan ida dala ida, “dehan Defeza arguidu nian, Manuel Exposto ba STL, iha Kaikoli, Dili, Kuarta (17/09/2025).
Tuir nia, arguidu submete mai iha Tribunal, no Ministeriu Publiku promove ho krime Arma Branka, no Ofensa Integridade Fisika Simples ho Forma Violensia Domestika.
Maibe iha alegasaun Prokurador husu Tribunal atu aplika medida Aprezentasaun Periodika, no defeza mos husu atu aplika medida Aprezentasaun Periodika. Kazu nee akontese entre arguidu hanesan laen, neebe deskonfia halo krime hasoru nia fen.
Tuir observasaun jornalista STL iha terenu haree katak, arguidu lori mai iha Tribunal hatais ropa detidu no akompanha husi autoridade seguransa PNTL.
Entretantu prosesu primeiru Interogatoriu nee, prezide husi Juiza turnu Fransisca Cabral, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Manuel Exposto.
Jornalista: Terezinha De Deus
Editora: Carme Ximenes
