DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial FdJF, tanba baku ka komete krimi hasoru lezada ho inisial AXF.
Tuir akuzasaun katak, iha loron 18 fulan Marsu tinan 2024, haleu oras tuku 15:00, OTL iha Bebonuk, Dili, arguidu FdJF tuku ofendida nia kanuruk dala rua, tuku tan dala ida kona iha ofendida nia ulun.
Antes, iha loron 30 fulan Setembru tinan 2023, ho fulan Outubro tinan 2023, arguidu basa dala tolu kona iha ofendida nia matan laran, tuku dala ida kona iha ofendida nia kabas, arguidu kaer metin ofendida nia liman rua hodi silu ofendida rabat ba parede no arguidu lori kadeira masa baku ofendida nia isin lolon, no buti ofendida nia kakorok.
Depois de akontesimentu arguidu halo ameasa ba ofendida dehan “o labele apresenta keixa iha MP, karik o keixa mak komandu hasai ka halo separasaun serbisu ba arguidu mak arguidu sei oho tiha ofendida.
Konsekuensia direta husi arguidu nia hahalok, ofendida hetan moras, bubu no kanek iha ulun, kanuruk, liman, kotuk laran ho kakorok.
Kauza husi problema nee, tanba arguidu mosu ba uma ho intensaun atu husu arguidu nia dokumentus hodi hatama ba kreditu, maibe ofendida rejeta hodi la fo dokumentus sira nee.
Arguidu halo ho forma livre, deliberada no konsientemente, hatene katak, halo bebeik agresaun fizika hasoru lezada hanesan konsta iha akuzasaun, nuudar tratamentu fizika no psikika la-diak hasoru nia konjuje, tanba lezada hanesan arguidu nia ferik oan rasik, maske nunee arguidu pratika nafatin hodi konkretiza dunik ninia hakarak.
Arguidu hatene katak, nia hahalok nee, proibidu no punidu tuir lei penal. Tanba nee, Konstitui arguidu nudar autor material ho forma konsumadu ba pratika krime maustratus ba konjjuje ho forma violensia domestika previstu no punidu tuir artigu 154ยบ husi Kodigu Penal konjuga ho artigu sira loron 07 fulan Julhu.
Hatan ba akuzasaun neebe iha arguidu deklara katak, faktus neebe iha balu loos no balu lalos.
Arguidu deklara, sira nain rua moris hamutuk maibe seidauk kaben iha Igreja, no sira fahe malu iha tinan 2023.
Arguidu deklara, nunka baku lezada, maibe sira fahe malu tanba lezada deskonfia arguidu bebeik ona, no ikus mai sira fahe malu lezada hodi ba hatoo keixa.
Arguidu deklara, momentu neeba lezada ameasa atu sunu arguidu nia dokumentus, tanba nee arguidu mos ba iha Bebonuk atu foti arguidu nia dokumentus, laos arguidu maka baku lezada, maibe lezada nia alin mane nain rua maka baku lezada.
Arguidu deklara, kona-ba diskuti malu iha, maibe kona-ba atu halo agresaun ba lezada la iha.
Iha sala julgamentu laran lezada deklara katak, sira fahe malu tanba arguidu hola feto seluk, no ikus mai arguidu mak deside lakohi lezada.
Lezada deklara, iha loron 30 fulan Setembru tinan 2023 lezada ba buka tuir arguidu iha Likisa, arguidu basa lezada dala ida, tuku iha kabas dala ida, no dudu lezada ba moru.
Lezada deklara, iha loron 30 fulan Outubru arguidu baku tan lezada iha Kampu Merdeka, bainhira lezada kaer toman arguidu ho feto seluk, depois arguida dudu ses lezada no lori kadera baku kedan lezada, no mos basa iha lezada nia matan.
Lezada deklara tan, iha fulan Marsu arguidu ba husu nia dokumentus lezada la fo ida, tanba nee arguidu duni tuir lezada hodi lori liman baku lezada dala rua.
“Arguidu baku hau iha ema barak nia oin hau sente moe, ami nain rua hola malu durante tinan sia iha oan nain tolu, maibe ikus mai nia selinkuh, hodi baku hau la konsidera hau hanesan inan ba nia oan nain tolu, “deklara lezada iha sala julgamentu.
Lezada deklara, oras nee dadaun arguidu hola feto seluk no kaben ona iha Igreja, tanba nee lezada mos hakmatek fokus ba servisu hodi tau matan ba nia oan nain tolu. Lezada mos deklara, durante nee arguidu la tau matan ba nia oan nain tolu, no lezada mesak maka tau matan ba labarik nain tolu.
Rona tiha lezada no arguidu, Tribunal adia ba loron seluk hodi rona sasin.
Audensia Julgamentu nee, prezide husi Juiz Koletivu, Ivan Patrocenio, Arjentino Nunes, Juiz estajiadu nain ida, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku, Jenini Daos.
Jornalista: Terezinha De Deus
Editora: Carme Ximenes
