DILI, STLTIMORLESTE.com – Tribunal Primeira Instansia Dili halao julgamentu ba kazu ofensa integridade fizika simples ho forma violensia domestika neebe envolve husi arguidu inisial MdS hasoru lezada inisial NS.
Kazu nee akontese iha 25 fulan- Agostu 2024 arguidu MdS baku lezada NS nudar arguidu nia fen kaben iha parte hasan dala rua no tebe iha kotuk laran.
Iha sala julgamentu lezada NS konfensa ba Tribunal katak, momentu neeba arguidu husu osan ba lezada, maibe lezada hatan ba arguidu katak osan laiha, osan hela dolar sanulu neebe atu hola labarik nia susuben. Maibe arguidu nafatin husu osan, nune sira haksesuk malu no lezada foti osan ne ba hola tiha nia oan nia susuben kaixa ida.
Hafoin ida nee arguidu kontinua husu ba lezada dehan osan laiha, maibe hola fali susuben nee, no lezada hatan osan hela dolar sanulu nee deit no osan nee ba atu hola susuben labarik nian.
Nune arguidu halai mai, basa leza iha parte hasan dala rua no tebe iha kotuk laran dala ida. Ho asaun nee mak lezada kous nia oan halai tiha ba nia inan aman sira nia uma.
Hatan ba depoimentu lezada nian, arguidu MdS hateten ba Trubunal singular katak, momentu neeba nia husu osan duni ba nia fen ( lezada NS) hodi uza ba nia nesesidade. Maibe tanba lezada osan dehan osan hela dolar sanulu deit atu hola labarik nia susuben.
Arguidu dehan, momentu neeba sira too haksesuk malu tanba nervozu entaun nia baku dala ida iha hasan.
Arguidu nega faktus neebe konsta iha akuzaun neebe hateten katak, nia basa lezada nia hasan dala rua no tebe lezadu nia kotuk laran dala ida nee lalos. Loos mak baku dala ida iha hasan tanba nervozu.
Hafoin rona tiha parte hotu Tribunal liuhusi Juis Sigular Zulmira Auxiladora autoriza ba kedan iha alegasaun ba kazu nee.
Iha alegsaun Ministeriu publiku neebe reprezenta husi Prokurador Napoliao Soares da Silva alega hodi solisita ba Tribunal katak, bazea ba produsaun deprova durante iha julgamentu lezada haktuir katak arguidu basa nia hasan dala rua no tebe iha nia kotuk laran.
Nunee arguidu nia aktu nee proevidu duni katak priense ba krime neebe Ministeriu Publiku imputa ba nia ofensa integridade fizika simples ho forma violensia domestika neebe previstu no punidu iha artigu 145 no husi lei kontra violensia domestika numeru 07/2010, loron 07 fulan Julhu.
Tanba nee, Ministeriu Publiku husu ba Trubunal atu aplika pena multa durante loron 60 ba arguidu MdS hodi selu osan dolar ida kada loron. Kuandu arguidu la la kumpre pena ida nee sei iha fali responsabilidade kriminal seluk no arguidu bele kumpre pena prizaun.
Defeza husi arguidu MdS, husu Tribunal atu aplika justisa neebe justu ba nia kliente tanba durante iha julgamentu ba kazu nee nia kliente rasik hateten ba Trubunal katak, nia halo asaun nee ho nervozu maibe laos ho intensaun.
Entretantu tuir akuzaun husi Ministeriu Publiku katak, indisiu sufisiente iha autus katak lezada NS moris hamutuk hanesan fen ho laen ho arguidu MdS hahu hosi tinan 2020, iha oan nain 1 (ida) no ekonomikamente dependensia ba malu.
Iha loron 05 fulan Agostu tinan 2024, haleu oras tuku 20:30, otl, iha Suku Ailok, Dili, arguidu MdS lori liman tuku ho makas dala ida kona iha ulun fatuk no ren tos, lori ain tebe ho makas dala ida kona iha ofendida nia kabas sorin karuk, lori ain tebe dala ida kona iha ofendida nia kelen sorin los, ho ida nee mak ofendida halai tiha ba nia maun sira kuaze fulan ida.
Arguidu hatene katak, nia hahalok nee, proibidu no punidu tuir lei penal.Tanba nee Konstitui arguidu MdS nudar autor material ho forma konsumadu ba pratika krime ofensa ba integridade fizika simples ho forma violensia domestika previstu no punidu tuir artigu 1450 hosi Kodigu Penal konjuga ho artigu sira 2, 3 alinea a, no artigu.350 alinea a, hosi Lei Kontra Violensia Domestika n.ยบ 07/2010, loron 07 fulan Julhu.
Hafoin Tribunal rona tiha parte hotu Tribunal liuhusi Juiza Zulmira Auxiladora neebe preside prosesu nee marka fali julgamentu nee ba loron 29 setembru 2025 tuku 14:00 loraik hodi rona desizaun.
Jornalista: Terezinha De Deus
Editora: Carme Ximenes
