DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain rua ho inisial MS ho AP, tanba komete krimi omisidiu no krimi arma proebidu hasoru lezadu MG no AL.
Iha sala audensia julgamentu laran juiz prosesu lee sai akuzasaun neebe mai husi Miniteriu Publiku katak, iha loron 15/02/2020, maizumenus tuku 17h00, arguidu sira tuda uluk lezadu MG neebe joga hela bola.
Akontesimentu tuda lezadu MG membru F-FDTL ho naran Loitiri mak interven hodi hakalma tiha situasaun no haruka lezadu MG no arguidu sira idak-idak fila ba uma.
Bainhira lezadu MG lao hela ba nia uma, arguidu MS ho AP tuda kona lezadu MG nia ulun neebe rezulta kanek no raan sai.
Ho kondisaun kanek no raan nee, lezadu MG halai ba nía aman AL hodi informa katak, apa, MS ho nia kolega sira tuda kanek hau nia ulun,” dehan akuzasaun nee.
Depois de rona tiha informasaun husi lezadu MG, lezadu AL sae ba Lucas nia uma hodi husu ba arguidu MS katak, tanba saida mak tuda hau nia oan MG nia ulun,” hatete akuzasaun nee.
Ho lezadu AL nia pergunta refere, arguidu MS no arguidu AP tuda no duni lezadu AL iha nakukun laran.
Iha minutu balun nia laran, arguidu sira kaer lezadu AL iha fatin naroman, hafoin arguidu MS no AP taa lezadu.
Arguidu MS taa kona lezadu AL nia kotuk laran no arguidu AP taa lezadu AL nia liman sikun parte los.
Arguidu AP taa tan dala ida iha lezadu AL nia kakorok, maibe lezadu tahan ho liman, tanba nee katana kona deit lezadu nia kabas parte karuk deit.
Konsekuensia direta no nesesariu husi arguidu sira nia asaun refere, rezulta lezadu MG sofre kanek iha ulun tanba tuda no lezadu AL sofre kanek iha kotuk laran, liman no kabas tanba taa ho katana husi arguidu sira.
Lezadu MG no AL halo tratamentu mediku iha Hospital Nasional Guido Valadares (HNGV), Dili.
Ho faktu no sirkunstansia sira temi ona ha leten, konstitui arguidu sira nudar autor material ba konkursu krimi hanesan tuir mai, arguidu MS ho AP nuudar autor material ho forma konsumada ba krimi ofensas ba integridade fizika simples ida, tuir artigu 145/1 KP, arguidu MS no arguidu AP nuudar ko autor material ho forma tentada ba krimi omisidiu ba forma tentada, tuir artigu 138 konjuga ho art 23 no 24 Kodigu Penal.
Arguidu MS no arguidu AP nuudar ko autor material ho forma konsumada ba krimi arma proibidu tuir art. 2/1 aln b), 2 al. f) konjugadu ho art. 20/1 husi lei no 5/2017, loron 19 fulan Abril.
Hatan ba akuzasaun, arguidu MS nega ba faktus katak akuzasaun neebe tribunal lee sai sala hotu. Arguidu deklaran, momentu neeba tuku 5:00 loraik arguidu ba joga bola too tuku 06:00 arguidu fila ba uma hasoru labarik nain tolu ho naran Manuel, Mauki ho Amanu baku malu hela depois arguidu fila liu ba uma too uma arguidu troka hotu lansung ba nia maun nia uma atu koalia asuntu kultura sau batar.
Arguidu deklaran tan, arguidu fila husi nia maun nia uma haree motor para iha uma laiha, tanba nee arguidu husu nia feen katak motor ba tiha neebe, nia feen hatan katak motor polisia sira mai foti tiha.
Arguidu dehan, momentu neeba arguidu la tuda lezadu MG no la kaer nia isin.
Arguidu AP mos deklara katak, momentu neeba arguidu fila husi servisu haree lezadu MG ho nia kolega sira hemu tua iha sira nia uma oin, maibe arguidu la hetan MS iha neeba.
Sasin Loitiri deklara katak, momentu neeba sasin fila husi servisu fatin Metinaro too uma sasin deskansa oituan rona lezadu MG ho AL sira hemu tua barulhu loos tanba nee sasin silu ai baku sira no sira halai namkari. Momentu neeba arguidu MS ho AP mos hemu tua hotu.
Sasin deklara tan, momentu neeba sira halai hotu lezadu AL lori katana lao tuir sira, tanba nee sasin hase katak tanba saida mak ita lori katana, lezadu hatan katak “o la hatene”, hafoin lezadu lao liu tiha sasin mos tama ba uma laran. Dader sasin hader haree fali katana iha uma oin.
Sasin informa tan, momentu neeba sasin la haree ema taa lezadu AL.
Rona tiha parte rua Tribunal adia ba loron seluk hodi kontinua rona sasin.
Audiensia Julgamentu nee Prezide husi Juiz koletivu Zulmira Auxiladora, Ivan Surita no Juiz estajiadu nain ida, MP reprezenta husi Prokurador, Antonio Tavares da Silva no arguidu sira hetan asistente legal husi Advogadu Privadu, Jil.
Jornalista: Terezinha De Deus
Editora: Carme Ximenes
