DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu nain 8, maibe arguidu nain 1 mate tiha ona, tanba nee julga deit arguidu nain 7.
Tuir akuzasaun neebe Juiz Prosesu Arjentino Nunes lee sai katak, arguidu sira hanesan, MCBA, VSM, AS, SB, ARdSS, LM, OD, AdFS, arguidu sira relasaun ho lezadu hanesan vizinu.
Iha loron 20 fulan Julhu tinan 2023, arguidu MCBA, VSM, AS, SB, ARdSS, MBD, LM, OD, ba iha lezadu AdFS nia uma neebe lokaliza iha Bairru Pite.
Iha fatin nee arguidu AS hamutuk ho nia oan mane, no arguidu ARdSS neebe lori martelu, sae ba iha uma nia kakuluk hodi sobu kalen no ai neebe iha.
No arguidu BMD hasobu janela neebe iha, no arguida LM baku blok neebe iha. No mos arguidu OD tesi tiha fiu eletrisidade neebe maka iha.
Konsekuensia husi arguidu sira nia hahalok, halo lezadu sofre nia uma hetan estraga.
Tanba nee Ministeriu Publiku (MP) akuza arguidu komete krime Danu Agravadu neebe previstu iha artigu 259 husi Kodigu Penal.
Hatan ba akuzasaun neebe iha, arguidu MCBA deklara katak, rai nee arguidu nian, maibe fo ba lezadu halo uma, depois ikus mai sira halo akordu ida entre arguidu sira no lezadu, atu lezadu sai husi fatin nee.
Arguidu deklara, iha akordu neebe iha lezadu mos aseita, no lezadu maka haruka arguidu sira ba sobu kalen, no momentu sobu kalen lezadu ho nia fen hamrik hotu iha oin.
Aleinde Tribunal konfirma fali ba iha arguidu nain neen, sira konfesa ba faktus konaba sasan sira neebe hasobu, hanesan kalen no ai, maibe sira rai hela iha fatin refere.
Arguidu sira mos reforsa, rai neebe lezadu halo uma ba, arguidu MCBA nia rai.
Aleinde nee lezadu konfirma katak, rai neebe lezadu halo uma ba arguidu MCBA nian, no lezadu mos kopera atu sai. Maibe lezadu la aseita maka arguidu sira hasobu tiha kalen ai no blok, la lori ba tau iha fatin neebe lezadu hela ba, maibe rai arbiru hela hodi ikus mai estragus.
Tanba nee maka lezadu husu deit arguidu, atu selu material sira neebe estragus.
Rona tiha ida nee, iha alegasaun Prokurador Bartolomeu de Araujo husu Tribunal tetu deklarasaun sira hotu, hodi aplika pena neebe justu.
Enkuantu Defensor Publiku Manuel Amaral husu Tribunal aplika pena neebe adekuadu ba sira.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Arjentino Nunes, Ivan Patrocenio, Zulmira Auxiladora, Ministeriu Publiku reprezenta husi Prokurador Bartolomeu de Araujo, arguidu hetan asistensia legal husi defensor Publiku Manuel Amaral.
Jornalista: Terezinha De Deus
Editora: Carme Ximenes
