DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain 8, tanba komete krime hasoru lezadu ho inisial DdS.
Prosesu refere antes nee Tribunal rona ona deklarasaun husi arguidu balu, tanba nee iha julgamentu kontinuasaun nee, Tribunal deside hodi kontinua rona deklarasaun husi arguidu IdCS.
Iha sala julgamentu laran arguidu IdCS deklara katak, akuzasaun neebe iha balu loos no balu lalos, iha momentu neeba sira han hamutuk iha kolega Asiu nia uma iha Aitarak Laran, no kolega Estive hetan moras asma sira lori ba ospital.
Arguidu deklara Estive ba ospital uluk, depois maka arguidu hamutuk ho arguidu JG, no DdDS tuir tan ba. Depois arguidu sira sei iha dalan, Estive nia feton maka telefone mai arguidu sira katak, sira fila tiha ona tanba doutor haruka sira fila, no dehan iha loron maka ba konsulta.
Arguidu deklara, depois de rona tiha ida nee arguidu hamutuk ho arguidu nain rua seluk mos fila, no sira fila liu kona Bidau nian sira haree kolega Leonardo ema nain tolu maka baku hela iha estrada, no arguidu sira to ema nain tolu nee mos halai ses.
Depois sira haree Leonardo hetan baku, sira para motor hodi ajuda lori Leonardo ba iha Aitara Laran, too iha neeba sira husu atu lori ba ospital maibe Leonardo lakohi.
Maibe momentu sira haree Leonardo, kanek boot iha kabas no kabun, halo ran sai barak. No deklara sira la lori buat kroat no la halo agresaun ba lezadu.
Rona tiha arguidu, Tribunal adia ba loron seluk hodi rona arguidu sira seluk nia deklarasaun.
Tuir akuzasaun katak, arguidu LMF, JG, SAAG, JG, DdDS, DFG, AdSS, IdCS, nuudar membru arte Ritual 77.
Iha loron 07 fulan Agusto 2017, oras tuku 03:00 Otl, arguidu sira ho kondisaun lanu, sae motorizada ho kanu resin halai iha estrada publika hodi kontra tranzitu husi Akait ba Bairo Formoza no mos halo barulhu.
Wainhira too iha Palasiu Governo nian oin, arguidu sira hakilar hodi hatudu jestu no mos tolok lezadu, nunee halo lezadu sente tauk.
Kuandu motorizada sira nee fila fali husi Bairo Formosa, arguidu sira balu hodi rama ambon hana ba lezado no balun hodi fatuk tuda lezadu nian liman kona fatuk, rezulta lezado nian liman parte karuk hetan moras no metan.
Nunee, komunidade sira sente la hakmatek hodi kontaktu ba Oolisia, kaer arguidu sira iha lokal, prende mos Rama ambon husi arguidu sira nian
motivu husi problema nee, tanba arte marsial hodi hamosu intranquilidade ba publiku.
Tanba nee, konstitui arguidu nuudar ko autoria material ba krime Utilizasaun ba arma Branka turi artigu 20 n. 2 alinea a) no mos artigu 200 n.1 husi Lei N.5/2017.
Hatan ba akuzasaun neebe iha arguidu DdDS deklara katak, momentu neeba sira hemu hamutuk hela, no sira nia kolega arguidu LMF sofre moras, tanba nee sira lori ba iha HNGV.
Arguidu deklara, too iha HNGV sira kondisaun lanu hela, tanba nee Doutor haruka sira fila, no dehan aban maka mai fali.
Arguidu deklara, sira fila liu husi Bidau Masau nian, haree lezadu monu hela iha trotoar leten, tanba nee sira deside atu lori lezadu ba iha ospital maibe lezadu lakohi, tanba nee sira tula lezadu fila fali ba nia uma.
Tribunal konfirma konaba lezadu nia kanek, arguidu deklara haree sasin kanek iha nia koskoleta no kabas, maibe arguidu sira la husu konaba kanek nee se maka halo.
Audensia julgamentu nee, prezide husi Juiz Kolektivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador, Aderito Tilman, arguidu hetan asistensia legal husi Defensor Publiku, Manuel Exposto.
Jornalista: Terezinha De Deus
Editora: Carme Ximenes
