DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial TBF, tanba halo agresaun hasoru ofendidu hanesan laen ho inisial MDC.
Tuir akuzasaun neebe Juiz prosesu Jose Gonsalves lee sai iha loron Kinta nee (06/02/2025) katak, ofendidu TBF moris hamutuk hanesan feen ho laen ho arguida MDC iha tinan 2022.
Iha loron 30 fulan Setembru tinan 2023, haleu oras tuku 08:30 OTL, iha Taratihi, Malere, Aileu, arguida foti fatuk natoon ida hodi tuda dala haat ba ofendidu nia ain, maibe la kona, arguida lori liman rakut ofendidu nia oin laran parte karuk no los, kaer iha ofendidu nia liman brasu parte los lori nehan tata.
Konsekuensia direta husi agresaun fizika nee, ofendidu hetan moras makaas iha oin parte karuk no los, kanek risku liman fatin, moras makaas iha liman brasu parte los, kanek raan sai barak no nehan fatin fitar too agora.
Ofendidu ba halo taratamentu iha Sentru Saude Aileu, maibe la aneksu atestadu mediku.
Kauza husi problema nee tanba ofendidu hase arguida neebe husik hela sira nia oan bebe halimar no han rai uut, nunee arguida nervozu hodi akontese problema nee.
Arguida halo ho forma livre, deliberada no konsientemente, hatene katak foti fatuk natoon ida hodi tuda dala haat ba ofendidu nia ain, maibe la kona, arguida lori liman rakut ofendidu nia oin laran parte karuk no los, kaer iha ofendidu nia liman brasu parte los lori nehan tata, nuudar meiu neebe aptu hodi hamosu ofensa ba lezadu nia isin lolon no saude.
Arguidu hatene katak nia hahalok nee proibidu no punidu tuir lei penal.
Tanba nee, konstitui arguida nuudar autor material ho forma konsumadu ba pratika krime ofensa ba integridade fizika simples neebe previstu iha artigu 145 Kodigu Penal no konjuga ho lei kontra Violensia Domestika nian lei numeru 07/2010, loron 07 fulan Julhu.
Hatan ba faktus nee, arguida konfesa imparsial sem rejervas, reforsa tan ho deklarasaun lezadu nian. Rona tiha deklarasaun sira nee, liu husi alegasaun Prokurador Napoliao da Silva husu Tribunal atu aplika pena multa US$ 15 ba arguida, enkuantu husi parte defeza Sebastião Amado husu Tribunal atu aplika pena admoestasaun.
Rona tiha deklarasaun sira nee, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Gonsalves, Ministeriu Publiku reprezenta husi Prokurador Napoliao da Silva, arguida hetan asistensia legal husi Defensor Publiku Joao de Carvalho.
(ter)
