DILI, STLTIMORLESTE.com – Tribunal Judisial Primeira Instansia Dili (TJPID) julga arguidu JPdSB, tanba komete krime hasoru lezadu EdC.
Iha sala julgamentu laran arguidu deklara katak, momentu neeba primeiru lezadu tolok uluk arguidu nia feen, no segundu lezadu sira hemu lanu loke muzika, no tuda arguidu sira nia uma.
Arguidu deklara, depois de rona fatuk kona uma tarutu, aguidu mos sai mai liur hodi ba husu lezadu, maibe arguidu foin koalia no hase lezadu atu toka muzika neneik, tanba muzika lian makaas halo sira deskansa la diak.
Arguidu afirma, foin koalia nunee lezadu hatan ba arguidu katak, ida nee demokrasia, no lezadu diretamente tuku uluk arguidu, tanba nee mak arguidu mos nervozu hodi tuku lezadu too monu ba rai.
Arguidu deklara, antes nee sira sempre iha problema, tanba deit lezadu gosta hemu tua, no loke muzika halo arguidu ho familia sira deskansa la diak, no momentu tuku lezadu arguidu mesak mak tuku, no arguidu nia kolega sira sori netik deit.
Arguidu deklara, arepende ona ba nia aktu nee, iha futuru sei la halo tan.
Rona tiha arguidu, Tribunal haree katak arguidu konfesa imparsial ba faktus, tanba nee presinde atu rona lezadu, tanba oras nee dadaun lezadu iha hela rai liur.
Nunee Tribunal husu ba iha Ministeriu Publiku (MP), atu tama ba iha faze alegasaun.
Iha alegasaun Prokuradora Bemvinda do Rosario, haree katak arguidu konfesa imparsial ba faktus, katak iha duni krime neebe MP akuza ba.
Tanba nee Ministeriu Publiku (MP) mantein ho krime neebe iha, husu Tribunal tetu atu aplika justisa ba arguidu. Enkuantu Defeza Estajiadu deklara katak, iha provokasaun husi lezadu maka arguidu halo asaun, hanesan defeza ba nia an. Tanba nee defeza husu Tribunal, tetu sirkunstansia atenuantes hotu, atu aplika desizaun neebe justu no adekuadu ba arguidu.
Rona tiha alegasaun, adia ba loron seluk hodi rona desizaun.
Tuir faktus katak, iha loron fulan Dezembru 2022, oras 20:00 Otl, iha aldeia Lemorai, suku Dare-Dili, wainhira lezadu JPdSB toba hela iha nian kuartu laran, rona arguidu EdC ho nian maluk sira dere ninian damatan, nunee lezadu hader ba hare, arguidu tuku kedas dala ida ba lezadu nian hirus matan no tuku dala ida ba lezadu nian matan fukun parte los halo lesadu monu ba rai.
Wainhira lezadu monu tiha ba rai, arguidu nian kolega sira seluk tuku no tebe lisuk lezadu, hafoin chefe aldeia nian oan mane ba sori netik.
Nunee vizinhu sira kontaktu ba Polisia hodi halo atuasaun iha lokal de krime, no lezadu submete ba tratamentu mediku.
Konsekuensia husi arguidu ho nian maluk sira nian hahalok halo lezadu sente moras no bubu iha nian hirus matan, ibun, matan fukun no isin lolon tomak nebe kona agresaun.
Motivu husi problema nee, tanba lezadu nian kolega toka muzika iha lezadu nia uma nunee, arguidu ho nian maluk sira hirus.
Arguidu EdC komete krime nee ho voluntaria, livre no Konsientemente, arguidu aktua ho forma deskrita, hatene katak nian hahalok tuku no tebe lezadu nian isin lolon, nuudar meius sira neebe aptu bele halo moras no bubu ba lezadu nian isin lolon neebe kona agresaun, maibe arguidu halo nafatin hodi kontra lei.
Tanba nee konstitui arguidu EdC hanesan autoria material ba krime ofensas ba integridade fizika Simples neebe previstu tuir artigu 145 husi Kodigu Penal.
Audensia julgamentu nee, prezide husi Juiz Singular Fransisca Cabral, Ministeriu Publiku reprezenta husi Prokuradora, Bemvinda Do Rojario, arguidu hetan asistensia legal husi Defensor Publiku Estajiariu nain ida.
Jornalista: Terezinha De Deus
Editora: Carme Ximenes
