DILI, STLTIMORLESTE.com – Tribunal Judisial Primera Instansia Dili kontinua halao julgamentu ba kazu Eis Ministru Defeza Cirilio Jose Jacob Valadares Cristovão nia osan lakon, hodi kontinua rona deklarasaun husi arguidu GAS.
Iha julgamentu kontinuasaun nee arguidu GAS deklara katak, momentu neeba arguidu mak foti pasta lima iha matebian nia uma, hodi entrega ba iha arguidu OCX.
Arguidu deklara, momentu neeba entrega tiha pasta lima ba arguidu OCX lori kedan ba tau iha karreta laran, no karreta laran iha arguidu OCX nia oan ida no nia kaben.
Kona-ba karreta nee atu lori pasta neebe ba tau iha neeba, arguidu la iha konhesimentu ona, tanba arguidu la tuir ba, maibe karreta neebe arguidu OCX utiliza hodi tula pasta lima nee, karreta Estadu no intelijensia nian.
Momentu neeba arguidu foti pasta lima nee sai mai, arguidu la loke hodi haree saida mak iha laran, maibe entrega diretamente ba iha arguidu OCX.
Rona tiha arguidu nia deklarasaun, Tribunal adia ba loron 13 fulan Dezembru tuku 9:30 hodi rona deklarasaun husi parte seluk.
Antes nee, arguida MDFA deklara katak, osan neebe arguidu RJC fo ba arguida MDFA hamutuk rihun US$ 25 laos rihun US$ 72 tuir faktus neebe iha.
Arguida deklara, osan neebe simu lori ba Indonezia hodi sosa ai-haan aimoruk no presiza sira nian, bainhira haree falecidu halao hela tartamentu iha Jakarta. Arguidu mos halo viajen mai husi Timor Leste ho Indonezia, no falecidu sei moras lori tan osan balu ba, no osan balu transfere ba matebian nia ATM.
Arguidu OCX deklara, kona-ba pasta sira neebe foti iha matebian nia uma iha Pantai Kelapa, la hatene osan ka dokumentus mak iha laran, tanba arguidu sira la loke. No pasta neebe foti matebian sei moris, no foti lori ba iha Jakarta.
Tuir akuzasaun neebe iha katak, OCX, AVR, RJC, MDFA DAJL, GLS, OVR, TSX. Arguidu GAS hanesan falecidu Cirilio Cristovao nia motorista, dezde faliceu asumi kargu hanesan Ministru Defeza antes mate iha tinan 2017, falecidu Cirilio Jose Jacob Valadares Cristovao lori testemunha Sergio Jose Cristovao no arguidu GAS ba nia fatin servisu kuartu laran, hodi hatudu osan nee ba sira.
Lezada BAC hanesan Espoza husi Cirilio Jose Jacob Valadares Cristovao deklara katak, arguidu sira hamutuk naok osan ho montante US$ 1.700.000 ka ho montante US$ 2.000.000.
Osan refere neebe guarda hela iha Cirilio Jose Jacob Valadares Cristovao nia kuartu laran arguidu sira naok fazeadamente, hanesan iha loron 14 fulan Novembru tinan 2018 arguidu GAS no OCX tama ba iha falecidu nia kuartu foti osan iha pasta lima osan ho montante osan iha laran hamutuk 1.700.000,00.
No iha loron no fulan la apuradu tinan 2018, arguidu RJC foti pasta ida entrega ba arguidu GAS depois liu loron ida entrega fali ba arguidu OCX ho montante osan hamutuk US$ 250.000,00 no iha loron no fulan la apuradu maibe iha tinan 2018 arguidu RJC foti pasta ida entrega ba arguida MDFA ho montante osan hamutuk US$ 72.000,00 no osan sira nee balu arguidu sira transfere ba fatin seluk no balu sira apropria tiha.
Katak osan nain maka Cirilio Jose Jacob Valadares Cristóvão, tanba osan ho montante refere rai iha nia Gavinete privadu neebe babain nia halao servisu kuandu iha uma Pantai Kelapa Dili. Katak Cirilio Jose Jacob Valadares Cristovao, durante moras halo traramentu iha Dili Zakarta no Bali antes hakotu vida, nia hanesan Ministru Defeza husi tinan 2015 toO 2017 no sei aktivu ho knar ida nee hanesan pasta funsaun publika ka halao knAar iha Funsaun Publiku nian.
Katak arguidu OCX no sira seluk ho forma livre, deliberada, konsientemente, iha tempu kalan, sobu janela no tama iha falecidu nia kuartu laran no foti sai tiha osan iha pasta hamutuk 7 ho montante hamutuk US$ 2.000.00 atu apropria ba sira ida idak nian.
Arguidu sira hateten hahalok nee proevidu, no hetan punisaun tuir lei penal, maibe kontinua pratika asaun nee.
Tanba nee, konstitui arguidu OCX, AVR, RJC no sira seluk, hanesan ko autor material ho forma konsumada ba krime Furtu Agravadu previstu iha artigu 252 husi Kodigu Penal.
Audensia Julgamentu nee, prezide husi Juiz Kolektivu, Jose Maria, Maria Solana, Afonso Carmona, Ministeriu Publiku reprezenta husi Prokurador Matias Soares, arguidu hetan asistensia legal husi Advogadu Privadu no Defensor Publiku.
(ter)
