DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial RML, ba kazu hadau telemovel iha motor leten neebe rezulta inan hetan kanek todan no oan feto tenke lakon vida.
Julgamentu nee halao iha loron Kuarta nee (11/12/2024), Iha sala julgamentu laran, Juiz prosesu Ivan Suritai lee sai akuzasaun katak, iha loron 12 fulan Maiu 2024, por volta 19h00 kalan, ofendida JEFS fila husi terrenu basket iha eskola Xina hodi ba foti nia oan vitima Niusia Fangidai Soares Jong iha Kuluhun atu fila ba iha sira nia hela fatin Pantai Kelapa, Dili.
Ofendida kondus motorizada marka Meo Beat, matrikula 05299 husi diresaun Kuluhun atu ba iha Pantai Kelapa Dili, too iha Kampun Alor, arguidu RML tula nia kolega JP neebe kaer ai tonka kondus motorizada marka Meo Beat tuir husi kotuk.
Arguidu konduz motorizada besik ba iha ofendida hodi liu husi sorin karuk, hodi arguidu nia kolega JP foti telemovel marka Oppo husi nia tilun parte karuk hodi kontinua halai liu.
Ofendida tenta duni tuir arguidu ho nia kolega JP, maibe JP lori ai tonka tuda ba ofendida nia motorizada hodi nia mos lakon kontrola soke trotoar monu ba rai vitima hetan kanek todan no nia oan liu loron rua mate iha hospital.
Konsekuensia husi arguidu sira nia asaun nee, halo vitima Nusia mate no vitima Juliana hetan kanek grave.
Arguidu sira hatene katak, bainhira hadau ema nia telemovel no halo violensia nee kontra ema nia vontade, maibe arguidu sira halo nafatin saida mak sira hakarak.
Arguidu halo krimi ho livre, deliberada konsentemente no hatene katak hahalok nee proebidu no hetan pena tuir lei.
Tanba nee, konsidera arguidu hanesan ko-autor material ba krimi Roubu neebe previstu iha artigu 253 husi Kodigu Penal.
Hatan ba akuzasaun neebe iha, arguidu RML konfesa ba faktus, arguidu deklara katak, momentu neeba arguidu ho nia kolega ho motor husi Diresaun Tasi ibun atu ba iha Kristu Rei. Maibe too iha dalan klaran, arguidu sira iha tarjetu hanoin atu foti sasan, tanba nee arguidu sira konduz motor hodi fila fali, too iha Diresaun Kampu Alor nian arguidu sira haree ofendida ho motor, arguidu sira mos konduz motor tuir ofendida hodi foti telemovel.
Arguidu deklara, kona-ba ofendida ho nia oan monu ho motor, arguidu sira la haree ona tanba arguidu sira halai liu.
Ofendida mos konfesa ba faktus katak, momentu neeba ofendida konduz hela motor, depois arguidu sira foti tiha ofendida nia telemovel, ofendida tenta duni tuir hodi hakilar maibe la iha ema ida rona hodi ajuda, too iha Loja Seara tasi ibun, ofendida lakon kontrola hodi soke ba iha trotoar.
Rona tiha arguidu no ofendida, Tribunal mos hasai kedan notifikasaun hodi notifika arguidu nia kolega JP no konstitui JP hanesan mos arguidu, tanba akuzasaun neebe iha JP hanesan sasin.
Rona tiha deklarasaun sira nee, Tribunal adia ba loron seluk hodi rona alegasaun.
Audensia julgamentu nee, prezide husi Juiz Koletivu, Zulmira Auxiliadora, Ivan Surita, Arjentino Nunes, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Manuel Amaral.
(ter)
