DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial RV hanesan kondutor, neebe halo asaun hasoru MAD hanesan Polisia Unidade Tranzitu Munisipiu Dili.
Tuir akuzasaun neebe Juiz Jose Quintao lee sai iha loron Kuarta nee katak, iha loron 03 fulan Dezembru tinan 2021, haleu tuku 08:05, Polisia Unidade Tranzitu Munisiplu Dili halao hela sira nia servisu diariu kona-ba kontrola no asegura movimentu transporte publiku sira tula pasajeru iha estrda publiku besik eis Merkadu lama nia oin.
Iha altura neeba MADP membru ida husi ekipa tranzitu haree hetan arguidu RV konduz mikroleta 01, tula pasajeru nakonu iha mikroleta laran, depois arguidu fuma hela sigaru.
Ho nunee MADP hakat besik ba arguidu hodi hase katak, “o hatene o nia sala ka lae, o hatene katak iha ona regra neebe fo sai husi Ministeriu Saude no parte Polisia nian kona-ba wanhira transporte publiku sira tula pasajeru, labele fuma iha transporte laran”.
Rona hanesan nee arguidu hatan ba MADP katak, hau fuma be nusa, mezmu hanesan ho kalma MADP husu ba arguidu atu aprezenta karreta nia dokumentu, maibe arguidu hatan katak, se hau la fo nusa, ho nunee MADP lolo liman ba xave atu hamate karreta, situasaun ida nee halo arguidu nervozu tun husi karreta laran, hakilar no hakarak baku malu ho MADP.
Kuandu arguidu tun husi karreta MADP tenta atu haksoit sae ba karreta laran, maibe arguidu halai ba kaer odamatan karreta nian no lori odamatan refere habit MADP nia ain parte karuk no liman fuan parte los no MADP sente moras tun husi kareta no buti kedan arguidu nia kakorok.
Tuir mai ekipa Polisia Unidade Tranzitu nian deside hodi halo kedan detensaun ba arguidu, aumezmu tempu halo mos aprensaun ba objetu sira.
Katak iha altura arguidu halo nia asaun sira nee, iha kondisaun ida MADP halo hela nia servisu hanesan membru Polisia husi unidade Tranzitu no nia rasik uza hela farda PNTL nian.
Konsekuensia direta no nesesariu husi hahalok arguidu nian nee, MADP hetan kanek iha liman fuan parte los no moras ain parte karuk no la halo nia servisu hanesan baibain, tanba tenke ba iha Sentru Saude Komunitaria Formoza nian hodi halo tratamentu.
Arguidu halo ho livre ho intensaun ho hanoin rasik, arguida mos hatene katak nia hahalok ida halo ho violensia ka ameasa grave hasoru orgaun Polisial neebe mak halo hela nia knaar iha terrenu no impede Polisia sira hodi labele halo intervensaun ba hahalok.
Arguidu nia hahalok nee kontra lei mezmu hanesan nee arguidu kontinua halo nafatin.
Ho hahalok sira nee konstitui arguidu RV nuudar autor material ho forma konsumadu ba krimi ida husi Obstrusaun ba Autoridade Publika previstu no punidu iha artigu 243 Kodigu Penal.
Hatan ba akuzasaun neebe iha, arguidu deklara katak, iha faktus balu loos no balu lalos.
Arguidu deklara katak, momentu neeba arguidu konduz duni karreta no iha karreta laran iha pasajeiru nain tolu no arguidu fuma hela sigaru.
Arguidu deklara, Polisia hamriik besik ba iha arguidu hodi hase arguidu, no MADP hamriik atu hasai save karreta nian, tanba nee mosu diskusaun entre sira nain rua. Arguidu deklara laos arguidu mak lori odamatan karreta nian habit MADP, maibe MADP mak lori liman baku arguidu nia ulun hodi nia liman moras.
Rona tiha arguidu, Tribunal adia ba loron seluk hodi rona deklarasaun husi MADP.
Audensia julgamentu nee prezide husi Juiz Koletivu, Jose Quintao, Jose Gonsalves, Jumiaty Freitas, Minsietriu Publiku Aderito Tilman, arguidu hetan asistensia legal husi Defensor Publiku Marsal Mascarinhas.
(ter)
