DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial MFS, tanba halo agresaun fizika hasoru lezada JS hanesan nia feen.
Iha audensia julgamentu laran Juiz singular Ivan Suritay lee sai akuzasaun neebe husi Ministeiru Publiku (MP) katak, arguidu MFS ho lezada JS moris hamutuk iha uma ida nuudar feen ho laen dezde tinan 2003.
Durante forma sira nia familia, lezada ho arguidu kous oan feto ida, ekonomikamente dependensia ba iha arguidu.
Iha loron 30 fulan Setembru tinan 2024, oras 18:00 OTL, arguidu halo agresaun fizika hasoru lezada iha sira nia uma, Aldeia Fomentu I, Komoro, Dili.
Katak motivu husi agresaun nee tanba arguidu nia kolega feto ida ho naran BL, neebe mak servisu hamutuk impresta arguidu nia osan ho valor dolar rihun sanulu resin lima (US$ 15.000,00).
Katak iha tinan 2022, arguidu nia kolega promete ba iha lezada katak, nia sei selu kada fulan ho valor osan dolar atus rua tolu nulu (US$ 230) ba iha lezada, no arguidu nia kolega nee hahu husi tinan 2022 too iha fulan Fevereiru tinan 2024 sei kontinua selu ho diak alias laiha problema.
Katak hahu fulan Marsu too fali fulan Setembru tinan 2024, arguidu nia kolega komesa la selu tuir nia promete, tanba nee iha loron 30 fulan Setembru tinan 2024, lezada rasik telefone ba ba aguidu nia kolega kona-ba pagamentu nee no arguidu nia kolega fo hatene fali ba arguidu.
Momentu iha oras 18:00 OTL, wainhira arguidu fila husi servisu too iha uma, arguidu la husu buat ida ba lezada, imediata husu uluk mak telemovel lezada nian, maibe lezada la fo mak arguidu halo kedas agresaun fizika hasoru.
Momentu neeba arguidu hodi liman mak basa dala haat ho makaas ba lezada nia hasan karuk, rabat ba matan ho tilun hun, hafoin arguidu kaer lezada nia fuk hodi rasta tun, tanba sente moras ona lezada mos hakilar no sira nia oan feto ho naran Marcia Mardila mak hakat ba hodi sori netik, hafoin lezada aproveita hodi halai ba nia maun boot nia uma hodi kontinua ba hatoo keixa iha Polisia Eskuadra Aimutin no kontinua transporta lezada ba iha Polisia VPU Kaikoli, Dili.
Konsekuensia husi agresaun arguidu nian, lezada sente moras, tanba bubu ho mean iha nia matan laran, moras iha tilun hun, lezada mos ba halo tratamentu iha sentru saude Pradet.
Arguidu halo ho forma livre, ho depropozitu halo agresaun fizika hasoru lezada JS, nuudar arguidu nia kaben, katak aktus mak arguidu halo hasoru lezada, konsidera hanesan meiu ida hodi halo moras ba lezada nia isin tuir buat ne’ebe mak hakerek ona iha leten.
Hahalok arguidu nian ho konsiensia rasik no hatene katak hahalok ne’e lei bandu maibe arguidu halo nafatin.
Ho hahalok sira nee konsidera arguidu MFS hanesan autor material ho forma konsumadu, pratika krimi ida violensia domestika tuir lei numeru 2010, ho forma ofensas integridade fízika simples tuir artigu 145 husi Kódigu Penál.
Hatan ba akuzasaun neebe iha, arguidu konfesa imparsial ba faktus katak, arguidu halo duni aktu refere, arguidu mos konfesa kona-ba motivu neebe iha.
Iha sala julgamentu laran lezada mos haforsa tan akuzasaun neebe iha katak, arguidu halo duni agresaun fizika ba lezada, tanba nee mak lezada sente ladaik hodi ba hatoo Keixa.
Rona tiha arguidu no lezada, Tribunal husu ba iha Ministeiru publiku (MP) atu tama ba iha alegasaun. Iha alegasaun Prokurador Hernani Ranjel husu ba Tribunal atu aplika multa ba arguidu tuir nia nesesidade. Husu mos ba Tribunal atu halo karta ida ba iha Funsaun Publiku, tanba arguidu hanesan funsionariu publiku, atu nunee iha futuru arguidu labele halo tan aktu refere.
Enkuantu parte defeza husu ba tribunal atu aplika pena neebe mak kmaan ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz singular Ivan suritay, Ministeiru Publiku reprezenta Prokurador Hernani Ranjel, arguidu hetan asistensia legal husi Defensor publiku Jose Guterres.
(ter)
