DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial BA, tanba halo agresaun ba nia feen (lezada) ho inisial FRS.
Iha indisus sufisiente katak, ofendida FRS ho arguidu BA hanesan feen no laen. Iha loron 3 fulan Agustu 2024, iha Aileu arguidu lanu todan, ho ida nee halo ofendida hirus arguidu, maibe arguidu tama liu ba toba iha kuartu laran, ofendida obriga atu arguidu labele toba no ofendida basa dala tolu kona iha arguidu nia kanuruk, nunee arguidu hikis aan hodi arguidu nia liman kona iha ofendida nia inus.
Konsekuensia husi arguidu nia hahalok nee, halo ofendida nia inus raan sai barak no kanek nakles.
Iha momentu neeba ofendida la ba halo tratamentu iha Hospital. Kauza husi problema nee ofendida obriga arguidu atu hader, maibe arguidu lakohi, ofendida obriga nafatin mak arguidu liki nia liman hodi kona ofendida nia inus.
Tanba nee mak Ministeriu Publiku akuza aguidu komete krimi Violensia Domestika ho forma Ofensa Integridade Fizika Simples neebe previstu iha artigu 145 Kodigu Penal, no lei Kontra Violebsia Domestika numeru 7/2010, loron 07 fulan Julhu.
Hatan ba faktus neebe iha, arguidu konfesa imparsial katak, momentu neeba arguidu kondisaun lanu mak toba hela, maibe lezada obriga arguidu hader hodi ba haree animal. Ho ida nee mak arguidu lakohi hader lezada basa arguidu, no dada arguidu haruka sai mai liur, momentu neeba arguidu mos moe hodi lori liman liki tiha lezada.
Arguidu deklara, la halo lori liman rakut lezada, maibe liki lezada mak arguidu nia liman kukun kona lezada. No antes nee sira la iha problema, ida nee foin akontese. Maibe momentu neeba liu tiha loron rua arguidu no lezada diak malu kedan.
Lezada mos deklara katak, momentu neeba lezada mak basa uluk arguidu, tanba nee mak arguidu lori nia liman liki lezada. Maibe depois hato tiha keixa, fila ba uma lezada no arguidu diak malu too agora.
Rona tiha arguidu no lezada, iha alegasaun Prokurador Napoliao da Silva husu Tribunal atu aplika pena multa ba arguidu.
Maibe defeza Manuel Exposto haree katak krimi refere la prienxe ba iha Violensia Domestika tanba arguidu no lezada baku malu, tanba nee husu Tribunal atu absolve arguidu.
Haree tiha ida nee, Juiz prosesu Ersilia de Jesus deklara katak, husi faktus neebe iha apura katak, momentu neeba arguidu lanu toba hela no lezada mak basa uluk arguidu, no ikus mai arguidu liki liman hodi kona lezada.
Tanba nee Juiza haree katak, faktus neebe iha prienxe ba iha krimi omisidiu neglijente neebe previstu iha artigu 148, ho natureza semi publiku, tanba nee lei fo dalan, kuandu arguidu no lezada diak malu ona, Tribunal deside omologasaun ba iha prosesu nee. Tanba nee ikus mai Juiz deside omologa prosesu nee, no absolve arguidu husi instansia.
Prosesu nee prezide husi Juiza Ersilia de Jesus, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
