DILI, STLTIMORLESTE.com – Tribunal Judisial Primera Instansia Dili halao julgamentu ba arguidu nain 3 ho inisial MJG, MS no MM, tanba komete krimi Ofensa Integridade Fizika Simples neebe previstu iha artigu 145 husi Kodigu Penal.
Antes nee Tribunal rona ona deklarasaun husi arguidu nain 3, tanba nee julgamentu kontinuasaun neebe halao iha loron Segunda nee (11/11/2024) Tribunal kontinua deklarasaun husi lezadu.
Iha sala julgamentu laran lezadu ZMG deklara katak, momentu neeba iha festa ida iha sira nia bairu laran kona-ba jogu final neebe sira nia bairu hetan vensedor, no lezadu nia alin mos partisipa hotu iha festa neeba.
Lezadu deklara, iha kalan nee lezadu hein nia alin seidauk fila tan mai uma, tanba nee lezadu tun ba iha festa nee hodi bolu lezadu nia alin, depois fila mai uma lezadu lao hamutuk ho nia primu DP, too iha lezadu sira nia uma lezadu foin tama ba uma laran atu foti bee malirin fo nia primu no osan atu sosa sigaru, derepente fatuk ida kona iha lezadu nia kanotak, no lezadu hakilar ho nia primu buka tuir se mak tuda nee, maibe ema halai hotu.
Ho nunee, lezadu kontinua ba iha fatin festa ninia hodi husu ba iha vizinhu ida ho naran Amin kona-ba se mak tuda lezadu, maibe Amin hatan dehan tuda lezadu be nusa, tanba nee mak lezadu no Amin tuku malu tiha, la kleur ema barak mai lezadu mos halai ses.
Lezadu deklara tan, depois lezadu halai tiha ba iha vizinhu ida nia uma mak sira kontaktu ba iha Polisia hodi mai. No lezadu sae tiha kareta Polisia nian, arguidu MG mak kontinua lori liman tuku lezadu kona iha inus too raan sai.
Lezadu hatete, too agora sira seidauk diak malu, no tuir lezadu nia hatene arguidu sira pertense ba iha grupu arte marsiais balu.
Rona tiha lezadu, Tribunal adia ba loron seluk hodi kontinua rona sasin.
Tuir akuzasaun neebe iha katak, iha loron 8 fulan Julhu tinan 2023, iha aldeia Terra Santa, ofendidu ZMG ho nia primu DP atu ba sosa sigaru.
Ofendidu tama ba iha uma laran atu foti osan no bee malirin atu hemu no sai fali mai taka odamatan, derepente arguidu MM foti fatuk ida tuda kona iha nia ofendidu nia kotuk laran, rezulta moras.
Ofendidu ho nia primu DP ba husu tuir arguidu sira, maibe seidauk too iha sira nia uma, arguidu sira lori fatuk tuda nafatin no halai, no sira kontinua duni tuir ba husu arguidu MM maibe nia kolega Amin hatan dehan, tuda o be nusa, tanba nee mak ofendidu ho Amin tuku malu.
Bainhira tuku malu hotu liu deit minutu lima, arguidu sira mai kaer fatuk ai no besi kanu iha liman laran, arguidu MJG kaer besi kanu atu baku iha ofendidu nia rentos, maibe nia lori liman sikun tahan hodi kona iha liman sikun no liman fuan hetan moras halo nia monu ba rai.
Arguidu MM kaer fatuk ida hodi tuda kona ofendidu nia ulun fatuk parte karuk, hetan nakles raan sai halo nia oin nakukun.
Bainhira Polisia ba iha fatin akontesimentu, arguidu sira halai hotu tanba nee Polisia tula ofendidu, maibe hasoru arguidu ho nia grupu sira, tanba nee Polisia para maibe arguidu MG loke odamatan hodi tuku tan dala rua kona iha inus rezulta kanek no raan sai, tanba nee mak ofendidu fo hatene motorista hodi kondus motorizada ba iha Eskuadra Dom Aleixo.
Tanba nee, Ministeriu Publiku akuza arguidu hanesan autor material ba krimi Ofensa Integridade Fisika Simples neebe previstu iha artigu 145 husi KP.
Audensia julgamentu nee prezide husi Juiz Singular Arjentino Nunes, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku, Nelson Borges.
(ter)
