DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial AdS hanesan oan mane, neebe baku ka halo agresaun hasoru nia inan lezada inisial OPdS.
Tuir akuzasaun neebe iha katak, iha loron 20 fulan Novembru tinan 2022 iha suku Ailok Dili, arguidu nervozu lori liman rua kaer metin ofendida hodi hanehan to ofendida monu ba rai.
Konsekuensia husi arguidu nia hahalok halo ofendida hetan moras iha ain tur. No iha tempu neeba ofendida la ba halo tratamentu iha ospital.
Kauza husi problema nee, arguidu sae ba rai lolon hodi hadia bee, nunee ofendida sae tuir ba koalia ba arguidu katak, ba serbisu ona husik ba “Hau ho Epifania maka hadia bee, nunee arguidu nervozu hodi tolok fali ofendida nia oan Sonia no Este, tanba nee maka ofendida hatan tanba sa maka o tolok o nia alin sira,” dehan akuzasaun nee.
Arguidu halo ho forma livre deliberada ho konsientemente, hatene katak lori liman rua kaer metin ofendida hodi hanehan too ofendida monu ba rai, nuudar meiu neebe aptu hodi hamosu ofensa ba ofendida.
Arguidu hatene, nia hahalok nee proevidu no punidu tuir lei penal.
Tanba nee Ministru Publiku (MP) akuza arguidu komete krime Ofensa Integridade Fisika Simples ho Forma Violensia Domestika previstu tuir artigu 145 ho lei kontra Violensia Domestika numeru 07/2010 loron 7 fulan Julhu.
Hatan ba faktus neebe iha arguidu deklara katak balu loos no balu lalos, kona-ba arguidu nia inan nee loos, no data neebe akontese mos loos.
Arguidu deklara, kona-ba dehan arguidu kaer metin lezada hodi hanehan lezada monu ba rai nee lalos, tanba momentu neeba arguidu tolok nia alin sira halo lezada nervozu, tanba nee maka lezada atu baku arguidu, maibe arguidu hakuak netik lezada, halo lezada liki nia liman hodi monu ba rai.
Arguidu afirma, haree lezada monu ba rai arguidu mos tauk hodi halai husi fatin refere. Maibe depois de lezada fila husi Polisia, arguidu monu ain fali ba lezada, husu deskulpa sira diak malu fali.
Rona tiha arguidu, Tribunal konfirma ba iha lezada, no lezada mos deklara katak, momentu neeba lezada liki nia liman maka halo lezada monu rasik ba rai.
Lezada rekonhese, sira diak malu ona hahu husi neebe mai to agora sira la iha tan problema ona, no arguidu mos husu deskulpa ba lezada.
Rona tiha arguidu no lezada, tama ba iha faze alegasaun Ministeriu Publiku husu Tribunal atu aplika justisa neebe justu ba arguidu.
No defeza haree katak, sira diak malu ona, husu Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Singular, Arjentino Nunes, Ministeriu Publiku reprezenta husi Prokuradora Estajiada, arguidu hetan asistensia legal husi Defensor Publiku, Eustaquio Guterres.
Jornalista: Terezinha De Deus
Editora: Carme Ximenes
