DILI, STLTIMORLESTE.com – Tribunal Judisial Primeira Instansia Dili halao julgamentu kona-ba prosesu osan lakon iha Instituto Camões neebe komete husi arguidu ho inisial MJJS.
Tuir faktus sufisiente katak, arguidu MJJS nuudar funsionariu Instituto Camões iha Dili, nuudar kontabilista no responsavel hodi kontrola xave kofre (brankas) Institutu nian.
Iha loron 23 fulan Maiu tinan 2022, maizumenus tuku 9:10 dader, iha eskritoriu Instituto Camões nian iha Kolmera-Dili, arguidu aproveita nia kolega PG nia auzensia, prende Instituto Camões nia osan neebe iha kofre laran, maizumenus ho montante US$ 3.08250.
Iha loron tuir mai, PG foin deskobre katak, arguidu mak foti osan husi kofre, tanba nee mak sira mos informa ba CICPF nuudar Diretora Instituto.
Arguidu ho intensaun atu rai montante osan neebe temi ona husi Instituto, hatene didiak katak ida nee laos ninian no katak hodi foti pose ba nia nuudar nain, nia atua kontra nia vontade.
Arguidu rekonhese katak, nia naok osan refere no promete sei fo fila iha tempu badak nia laran.
Nunee, iha loron 29 fulan Maiu tinan 2022, maizumenus tuku 2:00 loraik, arguidu fo fila osan US$1,000.00 no promete atu fo fila restu, maibe too ohin loron nia promesa seidauk kumpri.
Arguidu atua ho livre, voluntariu no ho konsiensia hodi kria kondisaun sira hodi naok osan husi kofre, hatene didiak katak ninia hahalok nee bandu no hetan kastigu tuir lei.
Bazeia ba buat sira iha leten, arguidu komete krimi furtu previstu iha artigu 251 no artigu 252 dispozisaun hotu-hotu iha Kodigu Penal.
Hatan ba akuzasaun neebe iha, arguidu konfesa imparsial ba faktus katak, arguidu mak foti duni osan refere no arguidu mos deklara osan neebe foti devolve ona US$ 1,000.00, hela restu mak arguidu seidauk devolve.
Arguidu deklara, kona-ba osan restu neebe iha, arguidu promote sei devolve iha fulan Janeiru, tanba nee husu atu Tribunal fo tempu ba arguidu.
Arguidu mos arepende ba nia hahalok nee no promete sei la halo tan hahalok nee iha futuru.
Sasin PG mos deklara katak, momentu neeba depois akontese tiha arguidu foti osan, liu tiha loron balu arguidu kontinua lori hikas osan nee ba entrega fali. Maibe kona-ba arguidu entrega hira, sasin la iha konhesimentu kona-ba ida nee.
Rona tiha arguidu, iha alegasaun Prokurador konsidera katak, provadu arguidu komete krimi nee, maibe arguidu devolve ona osan sorin, tanba nee husu Tribunal atu aplika pena minimu ho suspensaun ba periodu hanesan atu fo tempu ba arguidu hodi bele devolve hikas fali osan restu neebe iha.
Enkuantu defeza mos aseita ho pedidu Ministeriu Publiku nian, husu atu fo tempu arguidu devolve hikas osan restu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Jose Gonsalves, Jumiati Feitas no Jose Quintao, Ministeriu Publiku reprezenta husi Prokurador Gustavo, arguidu sira hetan asistensia legal husi Defensor Publiku, Fransisco Martins.
(ter)
