DILI, STLTIMORLESTE.com – Tribunal Rekursu halao ona kolokasaun ba Juiz estajiadu nain 12 neebe foin lalais simu pose ba iha Tribunal judisial Primeira Instansia (TJPI) haat.
Tuir Prezidente Tribunal Rekursu, Afonso Carmona katak, Juiz estajiadu nain 12 neebe sei halao estajiu durante tinan ida, koloka ona ba iha Tribunal Primera Instansia sira.
“Foun kolokasaun hotu ona, iha nain neen koloka iha Tribunal Judisial Primera Instansia Dili, nain rua iha Suai, nain rua iha Baucau, no nain rua iha Oecuse, “dehan Carmona ba jornalista sira, iha Kaikoli, Dili, Tersa (30/09/2025).
Nia hatutan, iha fulan neen nia laran sei halo rotasaun, sira nain neen iha Dili bele ba fali iha Munisipiu, no sira nain neen iha Munisipiu bele mai fali iha Dili.
Maibe hatan kona-ba instalasaun ba Tribunal Supremu Justisa (TSJ) nia parte dehan, agora planu hela atu hari komisaun atu haree kona-ba lei neebe iha ona se la fo fatin, halo alterasaun atu fasilita prosesu sira bele lao.
Tanba tuir planu neebe iha too iha fulan Maiu tinan 2026, maka foin haree kona-ba instalasaun. Maibe sei hari temporariu iha prediu tuan ka Tribunal Primera Instansia tuan neebe iha Mandarin, bele ajuda komisaun sira hodi halao servisu.
Iha fatin ketak, Jurista Sergio Dias Quintas dehan, ho Juiz estajiadu nain 12 neebe halao hela estajiu, bele aumenta ona numeru autor judisiariu.
“Hanoin ho Juiz nain 12 neebe halao hela estajiu, bele passa iha estajiu neebe iha hodi aumenta numeru rekursu umanus autor judisiariu sira nian,” dehan nia.
Nia dehan, ohin loron prosesu barak tama iha Tribunal, tanba nee presija numeru rekursu umanu atu reforsa servsisu Tribunal nian bele lao ho diak liu tan, liu liu redus kazu pendente neebe iha.
Jornalista: Terezinha De Deus
Editora: Carme Ximenes
