DILI, STLTIMORLESTE.com – Tribunal Judisial Primeira Instansia Dili liu husi desizaun ikus, kondena pena prizaun tinan 4 ba arguidu nain rua ho inisial ADS no PMS, tanba provadu komete krimi neebe Ministeriu Publiku akuza ba.
Iha sala julgamentu laran, loron Sesta (08/11/2024), Juiz prosesu Maria Solana deklara katak, provadus katak ba iha prosesu ida nee Ministeriu Publiku akuza arguidu nain tolu mak hanesan ADS ho krime omisidiu Simples no Arma Branka, arguidu VDS ho krimi Ofensa Grave, arguidu PMS ho krimi Ofensa Grave.
Juiz deklara, depois de produsaun de provas koletivu nee deside katak faktus sira neebe konsta iha akuzasaun provadu hotu.
Provadu katak, iha loron 5 fulan Novembru tinan 2023 akontese problema iha Bairo Poite, no joven nain rua ho inisial T no N, kaer fatuk hodi tuda arguidu PMS nia alin.
Provadu iha loron 6 fulan Novembru tinan 2023 tuku 8 dader, lezadu nain rua FM no ZS hadia hela motor hodi troka oli, iha momentu neeba arguidu sira mosu ba hodi diskuti malu, no arguidu ADS halai tama ba uma foti katana hodi taa liu iha lezadu FM suku pontu walu, no arguidu PMS kaer ai suak ida hodi halo kanek lezadu ZS nia kabun.
Provadu mos katak, problema nee nia hun tanba rai.
Tribunal haree katak, iha faze julgamentu arguidu ADS no PMS konfesa ba faktus katak, sira nain rua halo duni asaun hasoru lezadu nain rua.
Ho nunee, Tribunal mos tetu deklarasaun hotu, bazeia mos ba deklarasaun sasin sira nian, ikus mai Tribunal deside ba arguidu ADS, Tribunal halo fali alterasaun husi krimi omisidiu Simples ba iha krimi omisidiu ho Forma Tentada ho kastigu tinan 4 iha prizaun, arguidu PMS pena prizaun tinan 3 suspende tinan 3 mantein ho krimi Ofensa Grave, no arguidu VDS Tribunal husu absolvisaun.
Lee sai tiha desizaun nee, Tribunal mos ba iha parte Prokurador no Defeza atu la aseita desizaun neebe iha, bele halo rekursu durante loron 30 nia laran.
Desizaun nee lee husi Juiza Maria Solana, Ministeriu Publiku auzente, arguidu sira hetan asistensia legal husi Defensor Publiku Fransisco Soares.
(ter)
